అదే రోజున మహేష్ మురుగదాస్ ల చిత్రం ప్రారంభం

Posted: 02/15/2016 05:56 PM IST

టాలీవుడ్ ప్రిన్స్ మహేష్ బాబు హీరోగా ప్రముఖ తమిళ దర్శకుడు మురుగదాస్ దర్శకత్వంలో ఓ చిత్రం రూపొందనున్న విషయం తెలిసిందే. ‘శ్రీమంతుడు’ వంటి భారీ బ్లాక్ బస్టర్ హిట్ తర్వాత ప్రస్తుతం మహేష్ ‘బ్రహ్మోత్సవం’ చిత్రంలో నటిస్తున్నాడు. శ్రీకాంత్ అడ్డాల దర్శకత్వంలో రూపొందుతున్న ఈ చిత్రాన్ని పివిపి సంస్థ భారీ బడ్జెట్ తో నిర్మిస్తుంది.

ప్రస్తుతం ఈ చిత్ర షూటింగ్ శరవేగంగా జరుగుతోంది. ‘బ్రహ్మోత్సవం’ తర్వాత మహేష్-మురుగదాస్ కాంబినేషన్లో రూపొందనున్న ప్రాజెక్ట్ ఏప్రిల్ నెలలో సెట్స్ పైకి వెళ్లనుంది. ఏప్రిల్ 14వ తేదీన తమిళ కొత్త సంవత్సర పండుగ జరగనుంది. అదేరోజున మహేష్-మురుగదాస్ సినిమాను లాంచ్ చేసేలా మూవీ టీమ్ ప్లాన్ చేస్తున్నట్లు తెలుస్తోంది.

అలాగే ఈ చిత్రంలో మహేష్ సరసన కీర్తి సురేష్ ను హీరోయిన్ గా ఎంపిక చేసినట్లుగా సమాచారం. త్వరలోనే ఈ ప్రాజెక్టుకు సంబంధించిన అన్ని వివరాలు అధికారికంగా ప్రకటించనున్నారు. ప్రస్తుతం సమాజంలో జరుగుతున్న అన్యాయాలు, న్యాయవ్యవస్థ, రాజకీయాల వంటి అంశాలపై రూపొందనున్న ఈ చిత్రానికి ‘ఎనిమి’ అనే టైటిల్ ను పరిశీలిస్తున్నట్లుగా తెలుస్తోంది.