‘సరైనోడి’తో అంజలి పాప ఐటెం సాంగ్?

Posted: 11/03/2015 01:30 PM IST

‘సన్నాఫ్ సత్యమూర్తి’ తర్వాత స్టైలిష్ స్టార్ అల్లు అర్జున్ హీరోగా ప్రముఖ మాస్ చిత్రాల దర్శకుడు బోయపాటి శ్రీను దర్శకత్వంలో ఓ చిత్రం తెరకెక్కుతున్న విషయం తెలిసిందే. ఈ చిత్రానికి ‘సరైనోడు’ అనే టైటిల్ ను పరిశీలిస్తున్నారు. గీతా ఆర్ట్స్ బ్యానర్ పై నిర్మాత అల్లు అరవింద్ నిర్మిస్తున్నారు.

భారీ అంచనాలతో రూపొందుతున్న ఈ సినిమాలో ఓ హాట్ ఐటెం సాంగ్ వుందట. అయితే ఈ ఐటెం సాంగ్ కోసం ముందుగా అనుష్కను ఎంపిక చేసుకోవాలని అనుకున్నారు. ఇప్పటికే బన్నీ-అనుష్కలు కలిసి ‘వేదం’, ‘రుద్రమదేవి’ చిత్రాల్లో నటించారు. ఇటీవలే వచ్చిన ‘రుద్రమదేవి’ సినిమా విజయానికి బన్నీ ఎంతగానో హెల్ప్ అయ్యాడు. అందువల్ల బన్నీ కోసం ‘సరైనోడు’ సినిమాలో ఐటెం సాంగ్ చేయడానికి అనుష్క అంగీకరించినట్లుగా వార్తలొచ్చాయి.

కానీ తాజాగా ఈ ఐటెం సాంగ్ లో అనుష్కకు బదులుగా అంజలిని ఎంపిక చేసినట్లుగా తెలుస్తోంది. అనుష్క ప్రస్తుతం ‘సైజ్ జీరో’ సినిమా కోసం భారీగా తన బరువును పెంచేసుకుంది. ఈ అమ్మడు ఎంత తన బరువును తగ్గించుకున్నా కూడా ఐటెం భామకు కావాల్సినంత అందం, ఫిజిక్ అనుష్కకు ఇంత తక్కువ సమయంలో దక్కదు కాబట్టి.. అనుష్కను వద్దనుకున్నారట చిత్ర యూనిట్.

అయితే ఇటీవలే ‘శంకరాభరణం’ సినిమాలో అంజలి ఓ కీలక పాత్రలో నటించిన విషయం తెలిసిందే. అంతేకాకుండా ఇందులోని ఓ మాస్ సాంగ్ లో అంజలి అద్భుతంగా చిందులేసింది. అంజలి మాస్ స్టెప్పులు, యాక్టింగ్ చూసిన ‘సరైనోడు’ చిత్ర యూనిట్.. అంజలిని తమ సినిమాలోని ఐటెం సాంగ్ కోసం ఎంపిక చేయాలని భావిస్తున్నారట. ప్రస్తుతం అంజలితో ‘సరైనోడు’ నిర్మాతలు చర్చలు జరుపుతున్నారని తెలిసింది. త్వరలోనే అన్ని వివరాలు తెలియనున్నాయి.

ప్రస్తుతం ఈ చిత్ర షూటింగ్ శరవేగంగా జరుగుతోంది. ఇందులో బన్నీ సరసన రకూల్ ప్రీత్ సింగ్ హీరోయిన్ గా నటిస్తుంది. ఈ చిత్రాన్ని వచ్చే ఏడాది సంక్రాంతి కానుకగా విడుదల చేయడానికి చిత్ర యూనిట్ సన్నాహాలు చేస్తున్నారు. త్వరలోనే అన్ని వివరాలను అధికారికంగా ప్రకటించనున్నారు.