ఫ్యాన్స్ కు బన్నీ స్ట్రాంగ్ క్లారిటీ ఇచ్చేసాడట

Posted: 11/03/2015 12:44 PM IST

మెగా ఫ్యామిలీ గురించి ప్రతిరోజు ఏదో ఒక వార్త వస్తూనే వుంటాయి. ఇందులో వార్తలకంటే రూమర్లే ఎక్కువ. మెగా ఫ్యామిలీ విడిపోయిందని గతంలో వార్తలొచ్చాయి కానీ సమయం దొరికినప్పుడల్లా అందరూ కలుస్తూనే వున్నారు. మెగా ఈవెంట్ లకు పవన్ కళ్యాణ్ రాడు అంటూ నాగబాబు ఇటీవలే తన ఆగ్రహం వ్యక్తం చేసిన విషయం తెలిసిందే. అందుకు బదులుగా మెగాస్టార్ పుట్టినరోజు వేడుకలకు పవన్ కళ్యాణ్ విచ్చేసి సందడి చేసి, ఆ వార్తలకు స్వస్తి పలికాడు.

అంతేకాకుండా చరణ్ నటించిన ‘బ్రూస్ లీ’ సినిమా సక్సెస్ కావడం, ఈ సినిమాలో చిరంజీవి ఎంట్రీ ఇవ్వడంపై పవన్ కళ్యాణ్ చాలా సంతోషించి స్పెషల్ గా చిరంజీవి, చరణ్ లను కలిసి శుభాకాంక్షలు తెలియజేసారు. ఇలా సమయం కుదిరినపుడల్లా మెగా కుటుంబ సభ్యులంతా కలుస్తూ సంతోషంగానే వున్నారు. కానీ మెగా ఫ్యామిలీ సభ్యుల్లో కోల్డ్ వార్ నడుస్తోందంటూ వార్తలొస్తూనే వున్నాయి.

కానీ ఈ వార్తలపై మెగా ఫ్యాన్స్ కు  స్టైలిష్ స్టార్ స్ట్రాంగ్ స్టేట్ మెంట్ ఇచ్చేసాడట. ఇటీవలే ‘కుమారి 21 ఎఫ్’ ఆడియో వేడుకలో పాల్గొనేందుకు వెళ్లిన బన్నీని మెగా ఫ్యాన్స్ కలిసారట. వారి కోరిక మేరకు ఫ్యాన్స్ తో ప్రత్యేకంగా కలిసి బన్నీ ముచ్చటించారు. అయితే ఇందులో మెగా ఫ్యాన్స్ కు కొన్ని విషయాలు స్పష్టం చేసి, స్ట్రాంగ్ స్టేట్ మెంట్ కూడా ఇచ్చేసాడట బన్నీ.

మెగా ఫ్యామిలీలో ఎలాంటి కోల్డ్ వార్ నడవడం లేదని, అందరి మధ్య సన్నిహిత్యం బాగుందని తెలిపాడట. ఎప్పటికి మెగా ఫ్యామిలీ నుంచి ఎవరూ వేరు కారని, మెగా హీరోస్ అంతా ఒకటేనని స్పష్టం చేసాడట. మెగా హీరోలకు సంబంధించిన సినిమా విడుదల సమయంలో ఏర్పాటు చేసే బ్యానర్లలో మెగా హీరోలందరి ఫోటోలు వుండేలా చూడాలని, ముఖ్యంగా మెగాస్టార్ చిరంజీవి ఫోటో ఖచ్చితంగా వుండాలని చెప్పాడట బన్ని.

మొత్తానికి బన్నీ ఇచ్చిన ఈ క్లారిటీతో మెగా అభిమానులు అంతా ఒక్కటయ్యే అవకాశం వున్నట్లుగా భావిస్తున్నారు సినీ అభిమానులు. మరి బన్నీ చెప్పినట్లుగా మెగా కుటుంబ హీరోల ఫ్యాన్స్ అంతా ఒక్కటిగా వుంటారో లేక మెగా ఫ్యాన్స్, పవర్ స్టార్ ఫ్యాన్స్ అంటూ విడివిడిగా తమ అభిమానాన్ని చాటుతారో అనే విషయం భవిష్యత్తులోనే తెలియనుంది.