ఉలగనయగన్ తో జోడి కట్టనున్న అమల

Posted: 11/04/2015 10:37 AM IST

తమిళ నటుడు ఉలగనయగన్ కమల్ హాసన్ తో అక్కినేని అమల మరోసారి జతకట్టనున్నారని తెలిసింది. గతంలో వీరిద్దరూ కలిసి నటించిన ‘పుష్పక విమానం’ మంచి విజయం సాధించింది. ఆ తర్వాత మళ్లీ వీరిద్దరూ కలిసి నటించలేదు.

అమల కూడా పెళ్లి తర్వాత సినిమాలకు దూరమయ్యారు. కానీ ఇటీవలే ‘లైఫ్ ఈజ్ బ్యూటీఫుల్’ సినిమాతో రీ ఎంట్రీ ఇచ్చారు. మంచి పాత్రలు వస్తే తప్పకుండా చేస్తానని ఇదివరకే ప్రకటించేసారు. అయితే తాజాగా కమల్ సినిమాలో ఓ విభిన్న పాత్రలో నటించే అవకాశం రావడంతో అమల గ్రీన్ సిగ్నల్ ఇచ్చినట్లుగా తెలుస్తోంది.

ఈ చిత్రానికి టికే రాజన్ దర్శకత్వం వహించనున్నారని తెలిసింది. తెలుగు, తమిళం, మలయాళం భాషలలో ఏకకాలంలో రూపొందనుందని, అమెరికాలో షూటింగ్ ప్రారంభం కానుందని సమాచారం. ఈ చిత్రానికి సంబంధించిన అన్ని వివరాలు త్వరలోనే అధికారికంగా ప్రకటించనున్నారు.

ప్రస్తుతం కమల్ హాసన్ నటించిన ‘చీకటి రాజ్యం’(తమిళంలో తూంగవనం) విడుదలకు సిద్ధమవుతోంది. ఈనెల 10న తమిళంలో, ఈనెల 20న తెలుగులో విడుదల కానుంది. మరి ఈ సినిమా ఎలాంటి విజయం సాధించనుందో చూడాలి.