కలిసి స్టెప్పులేయనున్న బావబామ్మర్దులు

Posted: 10/26/2015 04:16 PM IST

Nagarjuna venkatesh multi starrer movie gossips

టాలీవుడ్ లో ప్రస్తుతం మల్టీస్టారర్ ట్రెండ్ నడుస్తోంది. పైగా.. ఇద్దరు హీరోలు ఒకే సినిమాలో కలిసి నటించడం వల్ల వారిరువురికీ సంబంధించిన అభిమానులు థియేటర్లకు తరలిరావడంతో కలెక్షన్ల వర్షం కురుస్తుందనే భావనతో దర్శకనిర్మాతలు ఆ తరహా చిత్రాలు తీయడానికే మొగ్గుచూపుతున్నారు. ఇక.. సోలోగా విజయాలు సాధించలేకపోతున్న హీరోలు సైతం మల్టీస్టారర్ చిత్రాల్లో నటించేందుకు సుముఖతం వ్యక్తం చేస్తున్నారు. ఇప్పటికే సీనియర్ హీరో వెంకటేష్ వరుసగా మల్టీస్టారర్ సినిమాలు చేసుకుంటూ దూసుకపోతుండగా.. తాజాగా నాగార్జున కూడా ఆ జాబితాలోకి చేరిపోయాడు. ప్రస్తుతం తమిళ హీరో కార్తీతో ఓ మల్టీస్టారర్ చిత్రంలో నటిస్తున్న నాగ్... తన బావ వెంకటేష్ తో కలిసి మరో మల్టీస్టారర్ సినిమాలో నటించేందుకు ప్లాన్ చేస్తున్నాడని సమాచారం.

వ్యక్తిగత జీవితంలో బావబామ్మర్దులుగా వున్న వెంకటేష్, నాగార్జున ఇద్దరూ కలిసి ఇంతవరకు ఒకేసారి వెండితెరపై కనిపించలేదు. అప్పుడప్పుడు కెమెరాలకు క్లిక్ మనిపించారే తప్ప.. వెండితెరను షేర్ చేసుకోలేదు. ఇప్పుడు ఆ లోటును కూడా తీర్చబోతున్నారని ఇండస్ట్రీలో ప్రచారం జరుగుతోంది. నిజానికి నాగ్, వెంకీ ద్దరూ ఒకేసారి కథానాయకులుగా తమ కెరీర్ ప్రారంభించారు. ఇద్దరూ కూడా తమదైన శైలిలో మాస్, ఫ్యామిలీ ఆడియెన్స్ ను మెప్పిస్తూ వరుస హిట్లను తమ ఖాతాలో వేసుకున్నారు. కానీ.. ఈమధ్య కొత్త హీరోల హవా బాగానే కొనసాగుతుండటంతో వీరిద్దరి క్రేజ్ తగ్గుతూ వచ్చింది. ఈ విషయాన్ని త్వరగా తెలుసుకున్న వెంకటేష్.. తన కెరీర్ గ్రాఫ్ క్రింద పడిపోకముందే మల్టీస్టారర్ సినిమాలకు ప్రాధాన్యతనిస్తూ వరుసగా దూసుకుపోతున్నారు. ఇప్పుడు నాగార్జున సినమాలు సైతం వరుసగా ఫ్లాపులు అవుతుండటంతో.. మల్టీస్టారర్ చిత్రాలవైపు మొగ్గుచూపుతున్నారు. ఈ నేపథ్యంలోనే కార్తీతో కలిసి మల్టీస్టారర్ చిత్రంలో నటించేందుకు గ్రీన్ సిగ్నల్ ఇచ్చేశాడు.

ఈ తరుణంలోనే వెంకీ, నాగ్ ఇద్దరి కాంబినేషన్లో ఓ సినిమా రూపందే సమయం వచ్చిందని అంటున్నారు. ఇప్పటికే వీరిద్దరూ మల్టీస్టారర్ సినిమాకి సంబంధించిన కథను కూడా విన్నట్లు తెలుస్తోంది. స్టోరీలైన్ బాగా వుండటంతో అందులో నటించేందుకు ఇద్దరూ సుముఖంగా వున్నారని చెప్పుకుంటున్నారు. స్టోరీ ఫైనల్ అయిన తర్వాత అధికారిక ప్రకటన వెలువడే ఛాన్స్ వుందని ప్రచారం జరుగుతోంది. ఒకవేళ వీరి కాంబినేషన్లో నిజంగానే మల్టీస్టారర్ సినిమా తెరకెక్కితే.. అభిమానులకు పండగే పండగ!