క్రేజీ టైటిల్ తో రాబోతున్న మాస్ మహారాజ్

Posted: 10/06/2015 10:46 AM IST

Ravi teja dil raju upcoming film title bhogi

మాస్ మహారాజ్ రవితేజ నటించిన ‘కిక్2’ అనుకున్న స్థాయిలో విజయం సాధించకపోవడంతో... తన తర్వాత సినిమాలపై మరింత దృష్టి సారించాడు. ప్రస్తుతం రవితేజ నటిస్తున్న ‘బెంగాల్ టైగర్’ చిత్ర షూటింగ్ చివరి దశకు చేరుకుంది. త్వరలోనే ప్రేక్షకుల ముందుకు రాబోతుంది.

సంపత్ నంది దర్శకత్వంలో రూపొందుతున్న ఈ చిత్రాన్ని శ్రీ సత్యసాయి ఆర్ట్స్ బ్యానర్లో కె.కె. రాధామోహన్ భారీ బడ్జెట్ తో నిర్మిస్తున్నారు. ఇందులో రవితేజ సరసన రాశిఖన్నా, తమన్నాలు హీరోయిన్లుగా నటిస్తున్నారు. ఈ సినిమా తర్వాత దిల్ రాజు బ్యానర్లో రవితేజ ఓ చిత్రం చేయనున్నాడు.

‘ఓ మై ఫ్రెండ్’ ఫేం వేణు శ్రీరామ్ దర్శకత్వంలో రూపొందనున్న ఈ చిత్రాన్ని దిల్ రాజు నిర్మించనున్నాడు. అయితే ఈ చిత్రానికి ‘ఎవడో ఒకడు’ అనే టైటిల్ ఖరారు చేసినట్లుగా వార్తలొచ్చాయి. కానీ తాజాగా మరో టైటిల్ పేరు కూడా వినిపిస్తుంది. తాజాగా దిల్ రాజు ఫిల్మ్ ఛాంబర్ లో ‘భోగి’ అనే టైటిల్ రిజిస్టర్ చేయించారని తెలిసింది. ‘ఆనందంగా వుండేవాడు’ అనేది ట్యాగ్ లైన్.

అయితే ఈ రెండు టైటిల్స్ లో రవితేజ సినిమాకు ఖరారు కానుందో మరికొద్ది రోజుల్లో తెలియనుంది. ఈ ప్రాజెక్టు దసరా రోజు నుంచి సెట్స్ పైకి వెళ్లనుందని తెలిసింది. ప్రస్తుతం ఈ చిత్ర ప్రీ ప్రొడక్షన్ కార్యక్రమాలు శరవేగంగా జరుగుతున్నాయి.