రేవతి దర్వకత్వంలో పూరీ, ఛార్మీల సినిమా

Posted: 10/07/2015 10:28 AM IST

పూరీ జగన్నాథ్ దర్శకుడిగా ఎన్నో బ్లాక్ బస్టర్ హిట్ చిత్రాలను తెరకెక్కించిన విషయం తెలిసిందే. కానీ తన కొత్త సినిమా దర్శకత్వ బాధ్యతలను మాత్రం ఓ ప్రముఖ నటికి అప్పగించినట్లుగా తెలిసింది. ప్రముఖ నటి ‘గాయం’ సినిమా హీరోయిన్ రేవతి ప్రస్తుతం క్యారెక్టర్ ఆర్టిస్టుగా కొనసాగుతున్న విషయం తెలిసిందే.

రేవతి ఇప్పటికే పలు సందేశాత్మక చిత్రాలకు దర్శకత్వం వహించింది. ప్రస్తుతం పూరీ జగన్నాధ్ దర్శకత్వంలో రూపొందుతున్న ‘లోఫర్’ చిత్రంలో ఓ ప్రధాన పాత్రలో నటిస్తుంది. అయితే ఈ సినిమా షూటింగ్ సమయంలో పూరీ తన స్టోరీ కాన్సెప్టును రేవతికి వినిపించి, ఆ సినిమాను డైరెక్ట్ చేయాల్సిందిగా రేవతిని కోరాడట. స్టోరీ కూడా నచ్చడంతో రేవతి వెంటనే గ్రీన్ సిగ్నల్ ఇచ్చేసారని సమాచారం.

పూరీ స్వయంగా నిర్మించనున్న ఈ ప్రాజెక్టుకు హీరోయిన్ ఛార్మీ కూడా సహనిర్మాతగా వ్యవహరించనుంది. ఇప్పటికే ‘జ్యోతిలక్ష్మీ’ సినిమాతో నిర్మాతగా మారిన ఛార్మి.. మరోసారి తన అదృష్టాన్ని పరిక్షించుకోనుంది. ఇందులో రాజ్ తరుణ్ హీరోగా నటించనున్నాడు. బ్యూటీఫుల్ మెసేజ్ ఓరియెంటెడ్ సినిమాగా ఈ ప్రాజెక్టు రూపొందనుందని తెలిసింది. త్వరలోనే అన్ని వివరాలు తెలియనున్నాయి.

ప్రస్తుతం పూరీ దర్శకత్వంలో రూపొందుతున్న ‘లోఫర్’ చిత్రం షూటింగ్ పూర్తి చేసుకొని, పోస్ట్ ప్రొడక్షన్ కార్యక్రమాల్లో బిజీగా వుంది. వరుణ్ తేజ, దిశాపటాని హీరోహీరోయిన్లుగా నటిస్తున్నారు. త్వరలోనే ఈ చిత్రాన్ని ప్రేక్షకుల ముందుకు తీసుకురానున్నారు.