మహేష్ శ్రీమంతుడు విడుదల వాయిదా పడ్డట్లేనా?

Posted: 06/09/2015 09:55 AM IST

Mahesh babu srimanthudu movie release delay

టాలీవుడ్ సూపర్ స్టార్ మహేష్ బాబు హీరోగా నటిస్తున్న ‘శ్రీమంతుడు’ చిత్ర ఫస్ట్ లుక్ టీజర్ ఇటీవలే విడుదలై యూట్యూబ్ లో రికార్డులు క్రియేట్ చేస్తున్న విషయం తెలిసిందే. సూపర్ స్టార్ కృష్ణ పుట్టినరోజు సంధర్భంగా విడుదలైన ఈ చిత్ర ట్రైలర్ మహేష్ అభిమానులకు భారీ ఆనందాన్ని అందించింది. ఇప్పటికే ట్రైలర్ దుమ్ముదులిపేస్తుంది. ఇందులో మహేష్ లుక్స్ పరంగా చాలా స్టైలిష్ మరియు సింపుల్ గా కనిపిస్తుండటంతో అంచనాలు మరింత పెరిగిపోయాయి.

‘మిర్చి’ వంటి బ్లాక్ బస్టర్ హిట్ చిత్రం తర్వాత దర్శకుడు కొరటాల శివ దర్శకత్వంలో తెరకెక్కుతున్న ఈ ‘శ్రీమంతుడు’ చిత్రంపై భారీ అంచనాలే నెలకొన్నాయి. ఇందులో మహేష్ చెప్పిన డైలాగ్స్ ఇప్పటికే అభిమానులకు పిచ్చి కిక్ నిస్తున్నాయి. సినిమా ఎప్పుడు విడుదలవుతుందా అని అభిమానులు ఎంతగానో ఎదురుచూస్తున్నారు.

‘శ్రీమంతుడు’ చిత్రానికి దేవిశ్రీప్రసాద్ సంగీతం అందిస్తున్నాడు. దేవి అందించిన ఈ చిత్ర ఆడియోను ఈనెల చివర్లో విడుదల చేయనున్నారని తెలిసింది. అయితే ఈ చిత్రాన్ని జులై 17న విడుదల చేయబోతున్నట్లుగా గతకొద్ది రోజులుగా వార్తలొస్తున్నాయి. కానీ తాజా సమాచారం ప్రకారం ఈ చిత్రాన్ని జులై 31న విడుదల చేయడానికి చిత్ర యూనిట్ సన్నాహాలు చేస్తున్నట్లుగా తెలిసింది. ఈ విషయంపై త్వరలోనే చిత్ర యూనిట్ ఓ అధికారిక ప్రకటన విడుదల చేయనున్నారు.

భారీ అంచనాలతో రూపొందుతున్న ఈ చిత్రంలో మహేష్ సరసన శృతిహాసన్ హీరోయిన్ గా నటిస్తుంది. జగపతిబాబు, సుకన్య, రాహుల్ రవీంద్ర కీలక పాత్రలలో నటిస్తున్నారు. అసలే వరుస ఫ్లాపులతో సతమతమవుతున్న మహేష్... ‘శ్రీమంతుడు’ చిత్రంతో ఎలాగైనా హిట్టుకొట్టాలని బాగా కసితో వున్నాడు. మరి ఈ సినిమా ఎలాంటి విజయం సాధించనుందో త్వరలోనే తెలియనుంది.