‘మా’ ఎన్నికల్లో మెగా-దాసరి ఇన్ సైడ్ కోల్డ్-వార్

Posted: 03/20/2015 11:30 AM IST

Maa president elections rajendra prasad jayasudha mega dasari cold war

‘మూవీ ఆర్టిస్ట్ అసోసియేషన్’ (మా) అధ్యక్ష పదవికి ఈనెల 29వ తేదీన ఎన్నికలు జరగనున్న విషయం తెలిసిందే! ప్రస్తుత అధ్యక్షుడు మురళీమోహన్ ఆ పదవి నుంచి తప్పుకుంటున్నానంటూ తెలపడంతో.. ఆ పదవిని చేపట్టేందుకు తాను ఆసక్తిగా ఉన్నట్లు నటకిరీటి రాజేంద్రప్రసాద్ ప్రకటించిన సంగతి విదితమే! దీంతో ఈ అధ్యక్ష పదవి ఎన్నికలు ఏకగ్రీవంగా జరగవచ్చునని అందరూ భావించారు. కానీ.. ఇంతలోనే తాను కూడా ఈ పోటీబరిలో పాల్గొంటున్నానంటూ సహజనటి జయసుధ ముందుకొచ్చారు. దీంతో ఈ పోటీ ఇప్పుడు రసవత్తరంగా మారింది. వీరిమధ్య పోటీ విషయం కాస్త పక్కనపెడితే.. వీరిద్దరికీ మద్దతు ప్రకటించిన వారిమధ్యే గట్టిపోటీ జరుగుతున్నట్లుగా వార్తలొస్తున్నాయి.

విషయం ఏమిటంటే.. ఈ ఎన్నికల్లో భాగంగా రాజేంద్రప్రసాద్ కు మెగాబ్రదర్ నాగబాబు మద్దతు పలికారు. ఆయన తరఫున మరికొంతమంది కలిసి తాము ప్రసాద్ గారికి ఈ ఎన్నికల్లో మద్దతు తెలుపుతున్నట్లుగా ప్రకటించారు. మరోవైపు.. సహజనటి జయసుధకు మురళీమోహన్ మద్దతు పలికారు. రాజేంద్రప్రసాద్‌తో తనకు ఎలాంటి విభేదాలు లేవని, యువ కళాకారులకు ప్రోత్సాహం ఇవ్వాలన్న ఉద్దేశంతోనే తాను జయసుధకు మద్దతు ఇస్తున్నానని మురళీమోహన్ వ్యాఖ్యానించారు. ఇక ఈమె ఎంపిక వెనుక దాసరి నారాయణరావు హస్తం కూడా వుందని తెలుస్తోంది. ప్రసాద్ కు మద్దతు పలుకుతున్న మెగాక్యాంప్ కు ధీటుగా సమాధానం ఇవ్వడం కోసమే దాసరి రంగంలోకి దిగి జయసుధకు మద్దతు పలుకుతున్నారని చర్చించుకుంటున్నారు. ఎందుకంటే.. వారిమధ్య గతకొన్నాళ్ల నుంచి కోల్డ్ వార్ నడుస్తున్న విషయం తెలిసిందే! తెరముందు బాగానే పలకరించుకున్నా.. తెరవెనుక మాత్రం ఒకరిపై మరొకరు విమర్శలు చేసుకోవడం ఎప్పటినుంచో జరుగుతూనే వుంది. ఇప్పుడు కూడా అలాగే ఈ అధ్యక్ష ఎన్నికల్లో వీరిమధ్య తెరవెనుక యుద్ధం జరుగుతోందని అనుకుంటున్నారు.

అంతేకాదు.. ఈ ఎన్నికల్లో రాజకీయాలు చోటు చేసుకున్నాయంటూ గుసగుసలు వినిపిస్తున్నారు. రాజకీయంగా చూస్తే.. నిజానికి జయసుధ కాంగ్రెస్‌ పార్టీలో మెంబర్ గా కొనసాగుతున్నారు. ఒక దశలో వైకాపాకు కూడా దగ్గరయ్యారయ్యారు కానీ.. అది వేరే విషయం! అయితే టీడీపీకి చెందిన మురళీమోహన్ ఆమెను బరిలోకి దింపడం ‘మా’లోనూ రాజకీయాలు దిగాయనడానికి నిదర్శనంగా కనిపిస్తోందని అంటున్నారు. ఏది ఏమైనా ఈసారి జరగబోయే ‘మా’ అధ్యక్ష పోటీలో ఈ రెండు వర్గాల మధ్య గట్టిపోటీ జరగనుంది. మరి.. వీరిలో విజయం ఎవరిని వరిస్తుందో..? వేచి చూడాల్సిందే!