ఎట్టకేలకు సునీల్ కి హీరోయిన్ దొరికింది

Posted: 03/20/2015 10:42 AM IST

‘భీమవరం బుల్లోడు’ సినిమా బాక్సాఫీస్ దగ్గర బోల్తాపడడంతో ఆ ప్రభావం సునీల్ సినీ కెరీర్ మీద చూపించింది. ఆ మూవీ తర్వాత ఇతనితో సినిమా చేసేందుకు దర్శకనిర్మాతలెవ్వరూ ముందుకు రాలేదు. కానీ.. ఈ నేపథ్యంలోనే ప్రముఖ నిర్మాత దిల్ రాజు ఈ హీరోతో ఓ భారీ బడ్జెట్టు మూవీ నిర్మించేందుకు ముందుకొచ్చారు. వాసు వర్మ దర్శకత్వంలో రూపొందుతున్న ఈ సినిమా ముహూర్త కార్యక్రమాలు గతేడాది ఆగస్టులోనే జరిగాయి కూడా!

కానీ.. హీరోయిన్, తారాగణం సెట్ కాకపోవడం వల్ల షూటింగ్ వాయిదా పడుతూ వచ్చింది. ఇలాగే వాయిదాలు వేసుకుంటూ పోతే మూవీ షూటింగ్ చాలా ఆలస్యమవుతుందని భావించిన యూనిట్.. సునీల్, ఇతర ఆర్టిస్టులతో కొన్ని సన్నివేశాల చిత్రీకరణ చేసుకుంటూ వచ్చింది. ఈ నేపథ్యంలోనే హీరోయిన్ కోసం ఎందరినో పరిశీలించారు కానీ.. సునీల్ తో నటించేందుకు ఎవరూ సుముఖుత చూపలేదు. అయితే.. ఎట్టకేలకు ఇన్నాళ్ల తర్వాత ఓ అమ్మడు ఈ హీరో సరసన నటించేందుకు గ్రీన్ సిగ్నల్ ఇచ్చినట్లు వార్తలొస్తున్నాయి.

సునీల్ సరసన హీరోయిన్ గా ‘తుంగభద్ర’ మూవీలో నటించిన డింపుల్ చోప్టే ఓకే అయ్యిందని సమాచారం! అలాగే.. మరో హీరోయిన్ గా గ్లామరస్ భామ సంజన సోదరి నిక్కి ఓకే అయినట్లు తెలుస్తోంది. చివరికీ హీరోయిన్లు ఓకే అవడంతో ఈ మూవీ షూటింగ్ వేగవంతంగా ముగించుకుని, త్వరలోనే విడుదల చేసేందుకు సన్నాహాలు చేస్తున్నట్లు యూనిట్ వర్గాలు తెలుపుతున్నాయి. గతకొన్నాళ్లనుంచి సక్సెస్ లేక సతమతమవుతున్న సునీల్ కు ఈ మూవీతోనైనా విజయం వరిస్తుందో లేదో వేచి చూడాల్సిందే!