సిద్ధార్థ్ దిల్ రాజుగా రాబోతున్నాడా?

Posted: 03/17/2015 10:18 AM IST

నటుడు సిద్దార్థ్ తెలుగు సినీ ఇండస్ట్రీపై పలు సంచలన వ్యాఖ్యలు చేసి, టాలీవుడ్ కు దూరమయిన విషయం తెలిసిందే. దీంతో తమిళ సినిమాలతో కాలం గడిపేస్తున్నాడు సిద్ధార్థ్. అయినా కూడా సిద్ధార్థ్ తన తమిళంలోని సినిమాలను తెలుగులోకి డబ్బింగ్ చేస్తూ వస్తున్నాడు.

అయితే ఇటీవలే సిద్ధార్థ్ నటించిన ‘జిగర్దాండా’ చిత్రం తమిళంలో విడుదలై మంచి విజయం సాధించింది. ఈ చిత్రాన్ని తెలుగులో ‘చిక్కడు దొరకడు’ పేరుతో డబ్బింగ్ చేయాలని అనుకున్నాడు. టైటిల్ తో కూడిన పోస్టర్లను కూడా విడుదల చేసారు. కానీ కొన్ని అనివార్య కారణాల వల్ల ఆ సినిమా విడుదల వాయిదా పడింది.

తాజా సమాచారం ప్రకారం ఈ చిత్రాన్ని తెలుగులో ‘దిల్ రాజు’ అనే పేరుతో విడుదల చేయనున్నట్లుగా తెలిసింది. దిల్ రాజు, సిద్ధార్థ్ కు మంచి అనుబంధం వుంది. గతంలో వీరి కాంబినేషన్లో ‘బొమ్మరిల్లు’ అనే బ్లాక్ బస్టర్ హిట్ చిత్రం వచ్చింది. ఆ తర్వాత పలు చిత్రాలు చేసారు. వీరికి వున్న సన్నిహిత్యం వల్ల ఈ సినిమాకు ‘దిల్ రాజు’ అనే పేరు పెట్టినట్లుగా తెలిసింది.

ఈ చిత్రాన్ని తెలుగులో దిల్ రాజు విడుదల చేయనున్నాడని సమాచారం. మరి ఈ సినిమా టైటిల్, విడుదల చేసే సంస్థతో పాటు... అన్ని వివరాలు తెలియాలంటే మరికొంత కాలం వేచిచూడాల్సిందే. ఈ సినిమాకు సంబంధించిన మరిన్ని వివరాలు త్వరలోనే తెలియనున్నాయి.