‘అల్లుడు’తో మరోసారి జతకడుతున్న మిల్కీభామ!

Posted: 03/16/2015 10:48 AM IST

టాలీవుడ్ ప్రముఖనిర్మాత బెల్లంకొండ సురేష్ తనయుడు బెల్లంకొండ సాయి శ్రీనివాస్ ‘అల్లుడు శీను’గా వెండితెరకు పరిచయమైన విషయం తెలిసిందే! ఈ సినిమాలో ఈ కుర్రహీరోతో మిల్కీబ్యూటీ తమన్నా ‘నా ఇంటి పేరు సిల్కు’ అంటూ హాట్ ఐటెం సాంగులో చిందులేసింది. ఇప్పుడు మరోసారి ఈ భామ ఈ అల్లుడితో జతకట్టనుంది. అయితే.. ఈసారి ఐటెం భామగా కాదు.. ఆ హీరో సరసన హీరోయిన్ గా నటించనుందని సమాచారం!

తమిళంలో హిట్టయిన ‘సుందర పాండియన్’ మూవీని దర్శకుడు భీమనేని శ్రీనివాసరావు తెలుగులో రీమేక్ చేయడానికి సన్నాహాలు చేస్తున్నారు. ఈ చిత్రంలో హీరోగా సాయి శ్రీనివాస్ నటిస్తుండగా.. కథానాయికగా తమన్నాను ఎంచుకున్నట్లు తాజాగా వార్తలు వినిపిస్తున్నాయి. తమన్నా అయితే తమ మూవీకి ప్లస్ పాయింట్ అవుతుందన్న నమ్మకంతో ఆమెను తీసుకున్నట్లు విశ్లేషకుల అభిప్రాయం! అయితే.. ఈ విషయం ఇంకా అధికారికంగా వెలువడాల్సి వుంటుంది. వచ్చేనెలలో సెట్స్ పైకి వెళ్లనున్న ఈ చిత్రానికి సంబంధించి మరిన్ని వివరాలు త్వరలోనే వెల్లడి కానున్నాయి.

నిజానికి బెల్లంకొండ సాయి శ్రీనివాస్ తన తదుపరి చిత్రాన్ని దర్శకుడు బోయపాటి శ్రీను దర్శకత్వంలో చేయాల్సి వుండేది. ఈ మూవీకి సంబంధించి ముహూర్త కార్యక్రమాన్ని నిర్మాత బెల్లంకొండ సురేష్ ఆమధ్య గ్రాండ్ గా నిర్వహించారు కూడా! అయితే.. ఆర్థికపరంగా ఇబ్బందులు తలెత్తడంతో ఆ మూవీ నిరవధికంగా వాయిదా పడింది. దీంతో ఈ అల్లుడు భీమినేనితో సినిమా తీసేందుకు కమిట్ అయ్యాడు.