బాలయ్య 100వ చిత్రం వరకు తనయుడికి ‘మోక్షం’ లేదు!

Posted: 03/17/2015 01:51 PM IST

ఇటీవలేకాలంలో నందమూరి బాలకృష్ణ తన తనయుడు మోక్షజ్ఞను ఫంక్షన్లకు తీసుకురావడంతో.. అతని ఎంట్రీ త్వరలోనే కాబోతుందని ఆమధ్య వార్తలు వచ్చిన విషయం తెలిసిందే! దీంతో నందమూరి అభిమానులు కూడా హర్షం వ్యక్తం చేశారు. కానీ.. అతని ఎంట్రీ ఎప్పుడన్న విషయం మాత్రం సస్పెన్స్ గానే మిగిలి వుండిపోయింది. అయితే.. తాజాగా ఆ విషయంపై చిక్కుముడి విడిపోయింది. బాలయ్య 100వ చిత్రం పూర్తయ్యే వరకు ఆయన తనయుడికి మోక్షం లభించదని తాజా సమాచారం!

ప్రస్తుతం బాలకృష్ణ హీరోగా నూతన దర్శకుడు సత్యదేవా దర్శకత్వంలో ‘లయన్’ (98వ) చిత్రం రూపొందుతోంది. ఈ సినిమా అనంతరం బాలయ్య 99వ మూవీ ఈరోస్ ఇంటర్నేషన్ బ్యానర్ లో ‘లౌక్యం’ ఫేం దర్శకుడు శ్రీవాస్ తెరకెక్కించనున్నారు. ఆ తర్వాత ఆయన 100వ చిత్రం చేయనున్నారు. ఆ మూవీకి సంబంధించిన ఇంకా వివరాలు తెలియరాలేదు కానీ.. వచ్చే ఏడాదికల్లా అది కూడా పూర్తవుతుందని సన్నిహిత వర్గాలు పేర్కొంటున్నాయి. ఆ 100వ మూవీ తర్వాతే మోక్షజ్ఞ ఎంట్రీ వుంటుందని బాలయ్య సన్నిహితులు వెల్లడిస్తున్నారు. బాలకృష్ణ కూడా తన 100వ ల్యాండ్ మార్క్ చిత్రం తర్వాతే తన తనయుడిని ఇండస్ట్రీలోకి ఎంట్రీ చేయిస్తే బాగుంటుందని భావిస్తున్నారట!

ప్రస్తుతం మోక్షజ్ఞ న్యూయార్క్ లో మేనేజ్ మెంట్ కోర్సు చేస్తున్నాడు. ఈ కోర్సు త్వరలోనే పూర్తి కాబోతోంది. ఈ కోర్సు చివరిదశలో వుండగానే మరోవైపు మోక్ష తన యాక్టింగ్ స్కిల్స్ ని ఇంప్రూవ్ చేసుకునే పనిలో నిమగ్నమయ్యాడు. అలాగే స్టంట్స్ కూడా నేర్చుకుంటున్నాడు. ఆ కోర్సు పూర్తికాగానే ఈ 20 ఏళ్ల మోక్ష పూర్తిగా సినిమాలమీదే దృష్టి సారించనున్నట్లు తెలుస్తోంది.