‘టెంపర్’ హిందీ రీమేక్ కి పెద్ద హీరో దొరికాడు!

Posted: 02/24/2015 04:22 PM IST

Temper hindi remake hero ranveer singh sachin joshi puri jagannath bandla ganesh

జూనియర్ ఎన్టీఆర్ తాజాగా నటించిన ‘టెంపర్’ చిత్రం ఇటీవలే విడుదలై బ్లాక్ బస్టర్ విజయాన్ని అందుకుంది. గతకొన్నాళ్లనుంచి ఒక్క సక్సెస్ లేక సతమతమవుతున్న ఎన్టీఆర్ కి ఈ చిత్రం ఊరటనిచ్చింది. విమర్శకులు సైతం ఈ చిత్రంపై ప్రశంసల వర్షాన్ని కురిపించారు. ఇంతటి ఘనవిజయాన్ని సాధించిన ‘టెంపర్’ హిందీ రీమేక్ రైట్స్ ని ఈ చిత్ర నిర్మాత బండ్ల గణేష్ సన్నిహితుడైన నటుడు సచిన్ జోషి సొంతం చేసుకున్నాడు. దీంతో హిందీ వెర్షన్ లో తెరకెక్కబోయే ఈ సినిమాలో సచిన్ జోషీయే హీరోగా నటిస్తారని అంతా భావించారు. కానీ ఆ వార్తలను అతను కొట్టిపారేస్తూ.. ఓ పెద్ద హీరో కోసం వెతుకుతున్నానంటూ అప్పట్లో పేర్కొన్నాడు. ఇప్పుడు ఆ పెద్ద హీరో దొరికినట్లు బాలీవుడ్ సమాచారం!

సచిన్ జోషి ముందుగా కొంతమంది బాలీవుడ్ బడా హీరోలను సంప్రదించిన అనంతరం.. చివరికి రణ్వీర్ సింగ్ ను ఫైనల్ చేసుకున్నట్లు వార్తలొస్తున్నాయి. ఒక అవినీతిపరుడైన పోలీసాఫీసర్ చివరికీ నిజాయితీపరుడిగా ఎలా మారాడన్న అంశం చుట్టు మూవీ కథ వుంటుందన్న విషయాన్ని తెలియజేయగా.. అందుకు అతను ఆకర్షితుడై ఓకే అన్నట్లు సమాచారం! అయితే.. ఈ విషయాన్ని సచిన్ ఇంకా అధికారికంగా వెల్లడించలేదు. ఇక ఈ మూవీని తెలుగులో తెరకెక్కించిన పూరీ జగన్నాథ్.. హిందీ రీమేక్ కి కూడా దర్శకత్వం వహించే అవకాశాలున్నాయి. త్వరలోనే ఇందుకు సంబంధించి మరిన్ని వివరాలు వెలువడి కానున్నాయి.