ఏ నక్కతోక తొక్కిందో.. అప్పుడే లక్ కలిసొచ్చింది!

Posted: 02/21/2015 01:34 PM IST

ఇండస్ట్రీలోకి ఎంట్రీ ఇచ్చిన వెంటనే భారీ ఆఫర్లు దక్కించుకోవడం అంత సామాన్యమైన విషయం కాదు! గ్లామర్ తోపాటు నటనాపరంగా నిరూపించుకుంటూ, వరుస విజయాలను అందుకునే తారలకే అది సాధ్యపడే అవకాశముంది. అయితే.. కొందరికీ మాత్రం లక్ వెంటనే కలిసొస్తుంది. రెండు, మూడు హిట్లు అందుకుంటే చాలు.. వరుసగా ఆఫర్లు వచ్చి పడుతుంటాయి. కానీ.. ఇక్కడ సాయేషా సైగల్ పరిస్థితి వేరు! ఏ నక్కతోకను తొక్కిందో తెలీదు కానీ.. ఇండస్ట్రీలోకి ఇంకా డెబ్యూ చిత్రం విడుదలకాకముందే ఒకేసారి మెగాహీరోతో నటించే ఆఫర్ ను దక్కించుకుంది.

వివి వినాయక్ దర్శకత్వంలో అక్కినేని అఖిల్ డెబ్యూ సినిమా చేస్తున్న విషయం తెలిసిందే! ఇందులో కథనాయికగా దిలీప్ కుమార్, సైరాభానుల మనవరాలైన సాయేషా సైగల్ నటిస్తోంది. ఈ సినిమా ఇంకా సెట్స్ పై వుండగానే ఈ అమ్మడికి టాలీవుడ్ నుంచి అప్పుడే ఆఫర్లు వచ్చిపడుతున్నాయి. బోయపాటి శ్రీను దర్శకత్వంలో అల్లు అర్జున్ హీరోగా ఓ చిత్రం రూపొందనున్న విషయం విదితమే! గీతా ఆర్ట్స్ సంస్థ నిర్మించే ఈ చిత్రంలో కథానాయిక పాత్రకోసం సాయేషాను సంప్రదించారట! ఇందుకు సంబంధించిన చర్చలు కూడా జరుపుతున్నారని వార్తలొస్తున్నాయి. కేవలం ఇదేకాదు.. మరికొన్ని భారీ ఆఫర్లు కూడా ఈమెకు వస్తున్నాయట! మరి అందులో వేటికి ఓకే చెబుతుందో వేచి చూడాలి!