బాహుబలిని వీడని బాలారిష్టం..?

Posted: 02/12/2015 01:12 PM IST

Bahubali movie maala caste filed case director rajamouli prabhas rana daggubati tamanna bhatia anushka

దర్శకధీరుడు రాజమౌళి ఎంతో ప్రతిష్టాత్మకంగా రూపొందిస్తున్న ‘బాహుబలి’ చిత్రం వరుసగా వివాదాల్లో చిక్కుకుంటున్నట్లు తెలుస్తోంది. ఇంకా విడుదలకు నోచుకుని ఈ మూవీకి.. తాజాగా మరో కొత్త చిక్కు వచ్చిపడింది. నిజానికి ఈ మూవీకి సంబంధించిన విషయాలన్నింటికీ చాలా గోప్యంగా వుంచుతున్నప్పటికీ.. ఎలాగోలా లీక్ అవుతూనే వుంది. ఆ లీకేజ్ సమస్య ఇప్పుడో తీవ్ర పరిణామానికి దారితీసింది. తమ మనోభావాలు దెబ్బతినేలా ‘బాహుబలి’లో సన్నివేశాలు చిత్రీకరిస్తున్నారంటూ ఓ సంఘానికి చెందిన కొందరు వ్యక్తులు ఈ చిత్రంపై పోలీసులను ఆశ్రయించినట్లు వార్తలొస్తున్నాయి.

వివరాల్లోకొ వెళ్తే.. ఇటీవలే ఈ మూవీకి సంబంధించి దాదాపు 15 నిముషాల నిడివిగల వీడియో లీకైన విషయం తెలిసిందే! దానిపై వెంటనే యాక్షన్ తీసుకున్న పోలీసులు.. ఆ వీడియో మరింతగా స్ర్పెడ్ కాకుండా దర్యాప్తు చేశారు. కానీ.. ఈ లీక్ అయిన సన్నివేశాల్లో ‘మాల’ల మనోభావాలు కించపరిచేలా వున్నాయని ఆ సంక్షేమ సంఘానికి కొందరు వ్యక్తులు కేసు నమోదు చేసినట్లు టాక్ వినిపిస్తోంది. దీంతో పోలీసులు ఆ లీకైన వీడియోను తిలకించేందుకు సిద్ధమవుతున్నారని సమాచారం! మరి.. ఇందులో ఎంతమేరకు నిజానిజాలు దాగివున్నాయో తెలీదు కానీ.. ప్రస్తుతం ఈ కేసుతో ‘బాహుబలి’ చిత్రానికి బాగానే ప్రచారమవుతోందంటూ విశ్లేషకుల అభిప్రాయం!

కాగా.. ఈ చిత్రంలో ప్రభాస్, రానా, అనుష్క, తమన్నాలు ప్రధాన పాత్రలు పోషిస్తున్న విషయం తెలిసిందే! తెలుగు పరిశ్రమలో ఇదివరకెన్నడూలేని విధంగా అత్యంత భారీ బడ్జెట్టుతో నిర్మిస్తున్న ఈ చిత్రాన్ని రాజమౌళి రెండు విభాగాలుగా విడుదల చేసేందుకు ప్లాన్ చేసిన సంగతి విదితమే! రానున్న వేసవి సెలవుల్లో ఈ మూవీ మొదటి పార్ట్’ను విడుదల చేసేందుకు దర్శకనిర్మాతలు సన్నాహాలు చేస్తున్నారు.