సెలబ్రిటీలకు వ్యక్తిగతమనేది ఉండదా?

Posted: 05/07/2014 10:30 AM IST

పూర్వకాలం రాజ్యాలేలే రాజుల అంతపురంలో పనిచేసేవాళ్ళు కోటలోని విషయాలను చేరవేస్తే బయట ప్రజలు చెవులు రిక్కించుకుని వినేవారట.  ఇప్పటికీ రాజకీయ నాయకుల వ్యక్తిగత విషయాలు బయటకు వస్తుంటాయి.  వాళ్ళ ప్రేమాయణాలైతే మరీ.  అయితే సినిమా రంగంలోని సెలబ్రిటీల విషయంలో ఇంకా ముందుకెళ్ళి వాళ్ళ భార్య గర్భవతా కాదా అన్నదాని మీద కూడా చర్చలు జరుగుతుంటాయి.  

రామ్ చరణ్ భార్య ఉపాసన గర్భందాల్చిందా అన్న వదంతులకు తెరదించుతూ ఆ దంపతులిద్దరూ బయట కనిపించారు.  దానితో వదంతులకు ప్రస్తుతానికి ఫల్ స్టాపైతే పడింది.  

కానీ కాదు అని చెప్పవలసిన అవసరాన్ని కల్పించినవారు వదంతులను లేవదీసినవారే.  ఏమైనా వార్త ఉండి, దాన్ని చెప్పదలచుకుంటే వాళ్ళే చెప్తారు కదా అని వూరుకోరు, స్పష్టంగా వాళ్ళని అడగరు కాని ఊహించుకుని ప్రచారాలు సాగిస్తుంటారు.  ఎందుకంటే సెలబ్రిటీల విషయంలో వార్తలను వినేవాళ్ళు దొరుకుతారు కాబట్టి.  చెప్పే వాళ్ళకి ఒరిగేదేమీ ఉండదు.  కేవలం తను చెప్పేదాన్ని నలుగురు శ్రద్ధగా వింటే అంతే చాలు వాళ్ళకి.  చెప్పగానే వార్త పాతపడిపోతుంది.  కానీ చెప్తున్నప్పుడు అవునా అని వినేవారిని చూస్తే వాళ్ళకి కలిగే కిక్కే వేరు.

సెలబ్రిటీలకున్న ఓపికే వేరు కానీ, వ్యక్తిగతంగా ఎవరైనా ప్రశ్న వేస్తే చాలామందికి చికాకు వేస్తుంది.  బయట వస్తువులు అమ్మేవాళ్ళు అరుచుకుంటూ వెళ్తారు.  కావాలంటే కొంటాం లేదంటే మాట్లాడకుండా ఇంట్లో ఉండిపోతాం కానీ, తలుపు కొట్టి మరీ ఫలానా వస్తువు కొంటారా అని అడిగే సేల్స్ పర్సన్స్ ని చూస్తే మంటెక్కుతుంది- వద్దు అన్నది కూడా చెప్పాల్సి వస్తుంది కాబట్టి!

అభిషేక్ ఐశ్వర్యలకు పుట్టిన బిడ్డ విషయంలో అమితాభ్ బచ్చన్ మొదట్లో వదంతులను చూసి కుటుంబసభ్యులంతా కడుపుబ్బ నవ్వుకుంటున్నాం అని ప్రకటించినా, ప్రసవం సమయంలో హాస్పిటల్ దరిదాపుల్లోకి ఎవరూ రావొద్దని, ఫొటోలు తీసుకోవద్దని, పెట్టే పేరు గురించి కానీ ఇతర విషయాలు కానీ ఎవరూ రాయవద్దని, ఏమైనా చెప్పదలచుకుంటే మేమే ప్రకటిస్తాం కానీ అప్రకటిత వార్తలను ప్రచురించినవారిమీద న్యాయపరంగా కఠిన చర్యలు తీసుకుంటామని గట్టిగా హెచ్చరించటంతో అన్నీ ఆగిపోయాయి.  

-శ్రీజ