Posted: 08/27/2012 06:22 PM IST

రాష్ట్రంలో నాయకత్వ మార్పుపై ఇప్పటికే ఒక స్పష్టమైన అవగాహనకు వచ్చిన కాంగ్రెస్ అధిష్ఠానం.. దీనిపై ముమ్మరంగా కసరత్తు చేస్తోంది. సాక్షాత్తు పార్టీ అధినేత్రి సోనియాగాంధీ, ఆమె తనయుడు రాహుల్ గాంధీ కూడా రాష్ట్రంపై దృష్టి సారించినట్లు సమాచారం. రాష్ట్ర రాజకీయ పరిస్థితులపై సమగ్ర సమాచారాన్ని ఇప్పటికే తెప్పించుకున్న కాంగ్రెస్ యువరాజు రాహుల్.. నాయకత్వంపై తనకంటూ ఒక నిర్దిష్ట అవగాహన ఏర్పరుచుకున్నారు.కోర్ కమిటీతో సోనియాగాంధీ నిర్వహించిన సమావేశంలో ఈ విషయం యాదృచ్ఛికంగా బయటపడింది. అసోంలో మళ్లీ అల్లర్లు చెలరేగి.. ఐదుగురు మరణించడంతో కాంగ్రెస్ అధినేత్రి సోనియాగాంధీ హడావిడిగా సమావేశం ఏర్పాటుచేశారు. ఈ సమావేశంలో ఏఐసీసీ ప్రధాన కార్యదర్శి రాహుల్ గాంధీ, సోనియా రాజకీయ సలహాదారు అహ్మద్ పటేల్, రక్షణమంత్రి ఏకే ఆంటోనీ, హోంమంత్రి సుశీల్ కుమార్ షిండే విస్తృతంగా చర్చించారు.అసోంపై సమీక్షించిన తర్వాత.. ఆంధ్రప్రదేశ్‌లో కూడా పరిస్థితి బాగోలేదన్న విషయంపై వారు కొద్దిసేపు చర్చలు జరిపినట్లు తెలిసింది.

ఆంధ్రప్రదేశ్‌లో పరిస్థితిని చక్కదిద్దేందుకు సోనియా తాను తీసుకుంటున్న చర్యలను వివరించారు. రాష్ట్రంలో ప్రత్యామ్నాయ నాయకత్వం, తెలంగాణ తదితర అంశాలపై కొద్దిసేపు చర్చలు జరిగినట్లు విశ్వసనీయవర్గాలు తెలిపాయి.జానారెడ్డి, మర్రి శశిధర్ రెడ్డి, ఉత్తమ్ కుమార్ రెడ్డి, డి శ్రీనివాస్ పేర్లు ఈ సందర్భంగా ప్రస్తావనకు వచ్చినట్లు ఈ వర్గాలు చెప్పాయి. ఈ నలుగురి గుణగణాలను, వారివల్ల రాష్ట్రంలో రాజకీయంగా కాంగ్రెస్‌పార్టీకి కలిగే లాభ నష్టాలపై కొద్దిసేపు చర్చించారు. అప్పటివరకు ఈ చర్చను మౌనంగా వింటున్న రాహుల్ గాంధీ ఉన్నట్లుండి పెదవి విప్పి రాష్ట్రం గురించి తన అభిప్రాయం చెప్పడంతో అందరూ ఆశ్చర్యపోయారు."నాకైతే ఫలానా వ్యక్తి ఉంటే బాగుంటుందనిపిస్తోంది..'' అని ఆయన చెప్పినట్లు సమాచారం. దీంతో మిగతా నేతలంతా తమ అభిప్రాయం చెప్పకుండా మౌనం పాటించినట్లు తెలిసింది. అయితే రాహుల్ ఎవరి పేరు ప్రస్తావించారు.. ఆయన ఏ అభిప్రాయాలు ప్రకటించారన్న విషయం మాత్రం రహస్యంగా ఉండిపోయింది.