Posted: 07/23/2012 04:56 PM IST

ప్రపంచవ్యాప్తంగా సంపన్నులు స్విట్జర్లాండ్, కేమన్ ఐలాండ్స్ వంటి ట్యాక్స్ హెవెన్స్ (పన్నులు చెల్లించనక్కర్లేని) దేశాల్లో దాచిపెట్టిన నల్లధనం విలువ ఎంతో తెలుసా? అక్షరాలా రూ. వెయ్యి లక్షల కోట్లు (13 ట్రిలియన్ పౌండ్లు). ఇది అగ్రదేశాలైన అమెరికా, జపాన్‌ల ఉమ్మడి జీడీపీకి సమానం. ఈ కళ్లు చెదిరే గణాంకాలను ట్యాక్స్ జస్టిస్ నెట్‌వర్క్ అనే సంస్థ తన అధ్యయనంలో బయటపెట్టింది.ఆ వివరాలను నివేదిక రూపంలో ‘ద అబ్జర్వర్’కు విడుదల చేసింది. 1980ల చివరి నుంచి అభివృద్ధి చెందిన దేశాల నుంచి నల్లధనం బయటకు భారీగా తరలడం మొదలైందని ట్యాక్స్ జస్టిస్ తెలిపింది. 1970ల నుంచి తరలిన ఈ నల్లధనం ఏ స్థాయిలో ఉందంటే ప్రపంచ దేశాల అప్పులు చెల్లించేందుకు ఈ సొమ్ము సరిపోతుందని సంస్థ అంచనా వేసింది. సరిహద్దులులేని గ్లోబల్ ఎకానమీని అడ్డం పెట్టుకొని ప్రపంచకుబేరులు 10 అగ్రశ్రేణి ప్రైవేటు బ్యాంకుల సాయంతో ఈ సొమ్మును దాచిపెడుతున్నారని వెల్లడించింది.

ఈ జాబితాలో స్విట్జర్లాండ్‌లోని యూబీఎస్, క్రెడిట్ స్యూయిస్‌లతోపాటు అమెరికా పెట్టుబడి బ్యాంకు గోల్డ్‌మన్ శాచ్స్ కూడా ఉన్నట్లు వివరించింది. కేవలం 2010లోనే ఈ బ్యాంకులన్నీ 4 ట్రిలియన్ పౌండ్లకుపైగా నల్లధనాన్ని దాచిపెట్టాయని పేర్కొంది. 2005లో ఈ సొమ్ము విలువ 1.5 ట్రిలియన్ పౌండ్లుగా ఉండేదని చెప్పింది. ప్రపంచ జనాభాలో కేవలం 0.001 శాతంగా ఉన్న 92 వేల మంది చేతుల్లో 6.3 ట్రిలియన్ పౌండ్ల ఆస్తులున్నట్లు ట్యాక్స్ హెవెన్స్ అంశాల్లో నిపుణుడు హెన్రీ లెక్కగట్టారు.ఆర్థిక సహకార ఒప్పందంలో భాగంగా పన్ను ఎగవేతదారుల జాబితాతోపాటు నల్లధనం కేసులకు సంబంధించిన వివరాలను పరస్పరం ఇచ్చిపుచ్చుకోవాలని భారత్-సింగపూర్ నిర్ణయించాయి. కేంద్ర ప్రత్యక్ష పన్నుల బోర్డు (సీబీడీటీ), ఇన్‌లాండ్ రెవెన్యూ అథారిటీ ఆఫ్ సింగపూర్ (ఐఆర్‌ఏఎస్)ల మధ్య ఢిల్లీలో జరగనున్న సమావేశాల్లో ఈ ఒప్పందం కుదరనుంది.