Posted: 07/15/2012 02:54 PM IST

గతంలో బాలీవుడ్ లో నాగార్జున, అమితాబ్ బచ్చన్ లు హీరోలుగా ఒక సినిమా వచ్చింది. ఆ సినిమా తెలుగులోకి కూడా డబ్బింగ్ అయ్యింది. తాజాగా మరోసారి నాగ్, బిగ్ బీలు కలిసి నటిస్తున్నారు. అయితే ఈ సారి సినిమాలో కాదు. వీరిద్దరూ ఒక జువెలరీ సంస్థ యాడ్ లో కనిపించనున్నారు. ఇప్పటికే మహిళల ఆభరణాల విషయంలో ఒక మేల్ మోడల్ కమ్ అడ్వైజర్ గా నాగార్జున నటిస్తున్న యాడ్ కు మంచి స్పందనే వస్తోంది.

దీన్ని దృష్టిలో పెట్టుకొని ఈ జువెలరీ సంస్థ దక్షిణాదిలో ఒక్కో భాషలో ఒక్కో హీరోతో యాడ్ చేయించాలని నిర్ణయించింది. ఈ మేరకు తమిళంలో ప్రభు, మళయాళంలో దిలీప్, కన్నడలో శివరాజ్ కుమార్ లతో యాడ్ చేసే ప్రయత్నంలో ఉంది ఆ నగల దుఖాణం. ఇక ప్రతి భాషలోనూ అమితాబ్ తో కలిసి ఆయా హీరోలు ఈ యాడ్ చేస్తారని తెలుస్తోంది. అలాగే ఉత్తరాదిలో కూడా ఫేమస్ అయ్యే ఉద్దేశంతో ఆ సంస్థ అమితాబ్ ను బ్రాండ్ అంబాసిడర్ గా నియమించుకొన్నట్లు తెలుస్తోంది. ఇలా దక్షిణాదిలో ప్రముఖ హీరోలతో కలసి యాడ్ చేయడాన్ని తాను చాలా థ్రిల్ గా ఫీల్ అవుతున్నానంటూ అమితాబ్ తన బ్లాగులో ప్రకటించాడు.