Posted: 07/11/2012 04:05 PM IST

     రాష్ట్రంలో కరెంట్ కోతలు మరింతగా పెరిగాయి. విద్యుత్ డిమాండ్ ను తట్టుకోలేక డిస్కంలు చేతులెత్తేయడంతో పవర్ కట్ భారీగా పెరిగింది. గ్రామస్థాయి నుంచి మహా నగరం వరకు కరెంట్ కోతలు అమలౌతున్నాయి. గ్రామాల్లో ఇంతకాలం 8 గంటలు ఉన్న విద్యుత్ కోతను ఏకంగా పది గంటలకు పెంచేశారు. మండల కేంద్రాల్లో ఐదు గంటల కోత 7 గంటలు చేశారు. ఇక జిల్లా కేంద్రాల్లో అయితే సరేసరి.. 3 గంటల పవర్ కట్ ను ఐదు గంటలకు పెంచారు. రాజధానిలో రెండు గంటలున్న విద్యుత్ కోతను  మూడు గంటలుగా మార్చారు. ఇవన్నీ అధికారిక కోతలు.. ఇక చీటికి... మాటికి ఐదు, పది నిమిషాలు తీసే కరెంట్ కు లెక్కేలేదు.  రాష్ట్రంలో అడపాదడపా వర్షాలు పడుతున్నా విద్యుత్ డిమాండ్ కు సరిపడా ఉత్పత్తి లేకపోవడంతో డిస్కంలు ఈ నిర్ణయం తీసుకున్నాయి.
      అటు పరిశ్రమల విషయంలో కూడా డిస్కంలు వెనక్కుతగ్గలేదు. రోజూ విద్యుత్ కావాలనే పరిశ్రమలకు వారంలో నాలుగురోజులు లేదా.. అవసరానికి 50 శాతం విద్యుత్ నే సరఫరా చేయాలని  నిర్ణయించాయి. దీంతో పారిశ్రామిక రంగం కాస్తా పడకేసింది. కరెంట్ కోతలపై సీఎం కూడా ఏం చేయలేకపోతున్నారు. నిన్న జరిగిన సమీక్ష సమావేశం సమయంలో  పవర్ కట్ పై ఆందోళన వ్యక్తం చేసినట్లు సమాచారం.అయితే సమావేశానికి హాజరైన  అధికారులు సీఎంకు పరిస్థితిని  వివరించారు. దీంతో సీఎం కూడా  ఇంతకంటే ఏం చేయగలమో మీరే చెప్పడంటూ మంత్రులను ప్రశ్నించినట్లు తెలుస్తోంది.

...avnk