Posted: 03/20/2012 10:02 PM IST

            ఖమ్మం జిల్లాలోని చంద్రుగొండ మండలం తుంగారం శివారులో ఘోర రోడ్డు ప్రమాదం జరిగింది. కొత్తగూడెం మండలం వేపలగడ్డకు చెందిన ఎల్వీ రెడ్డి స్కూల్ బస్సు అదుపు తప్పి వాగులో పడింది. ఈ ప్రమాదంలో 14 మంది విద్యార్థులు అక్కడికక్కడే మృతి చెందారు. మరికొంత మంది విద్యార్థులకు తీవ్ర గాయాలయ్యాయి. గాయాలపాలైన వారిని చికిత్స నిమిత్తం స్థానిక ఆస్పత్రికి తరలించారు. సహాయక చర్యలు కొనసాగుతున్నాయి.
           ఈ ఘోర రోడ్డుప్రమాద ఘటనపై ముఖ్యమంత్రి కిరణ్‌కుమార్‌రెడ్డి తీవ్ర దిగ్భ్రాంతి వ్యక్తం చేశారు. గాయపడిన విద్యార్థులకు మెరుగైన వైద్యం అందించాలని జిల్లా కలెక్టర్‌ను సీఎం ఆదేశించారు. కాగా, ఈ ఘటనలో డ్రైవర్‌పై మృతి చెందిన చిన్నారుల బంధువులు హత్యాయత్నం చేశారు. పాఠశాల బస్సు డ్రైవర్‌ను కొత్తగూడెం మండలం పెనుగడప వద్ద పట్టుకున్నారు. అంతటితో ఆగకుండా డ్రైవర్ గొంతు కోశారు. డ్రైవర్ పరిస్థితి విషమంగా ఉండటంతో కొత్తగూడెం ఆస్పత్రికి తరలించారు
           కాగా, ఇందుకు నిరసనగా జిల్లాలోని విద్యాసంస్థల బంద్‌కు పలు విద్యార్థి సంఘాలు పిలుపునిచ్చాయి. బుధవారం బంద్‌ను స్వచ్ఛందంగా పాటించాలని విద్యాసంస్థల యాజమాన్యాలను విద్యార్థి సంఘాలు కోరాయి. బస్సు బోల్తా ఘటనకు కారణమైన పాఠశాల యాజమాన్యం, డ్రైవర్‌పై కఠిన చర్యలు తీసుకోవాలని డిమాండ్ చేశాయి.

...avnk