Posted: 02/10/2012 06:52 PM IST

భారత బ్యాటింగ్ దిగ్గజం సునీల్ గవాస్కర్‌కు ఐసీసీ ‘హాల్ ఆఫ్ ఫేమ్’లో లాంఛనంగా చోటు లభించింది. దుబాయ్‌లో జరిగిన ఓ కార్యక్రమంలో మాజీ కెప్టెన్ కపిల్ దేవ్ ఈ ‘ప్రతిష్టాత్మక క్యాప్’ను సన్నీకి అందజేశాడు. జనవరి 2009లో ప్రాథమికంగా విడుదల చేసిన 55 మంది జాబితాలో గవాస్కర్ పేరు ఉన్నప్పటికీ ఆయనకు ఈ గౌరవం అధికారికంగా ఇప్పుడు దక్కింది. హాల్ ఆఫ్ ఫేమ్‌లో ప్రస్తుతం ఉన్న 72 మంది (పురుష, మహిళ) క్రికెటర్ల సరసన ఈ మాజీ కెప్టెన్ స్థానం సంపాదించాడు. ‘ఇదో గొప్ప గౌరవం. ఎందుకంటే దిగ్గజాలు ఈ జాబితాను ఎంపిక చేస్తారు. ఈ పురస్కారం లభించడానికి కాస్త సమయం పట్టింది.

అయినప్పటికీ చాలా సంతోషంగా ఉంది. భారత క్రికెట్‌లో కపిల్ ఓ మేటి ఆటగాడు. అతని నుంచి ఈ క్యాప్‌ను తీసుకోవడం నిజంగా గొప్ప విషయం. వరల్డ్‌కప్ (1983) విజేత బృందంలో సభ్యుడిగా కపిల్‌తో కలిసి నాకు చాలా ఆనందకర క్షణాలు ఉన్నాయి. ఈ ఆనందం ఎప్పుడూ నా వెంటే ఉంటుంది. కపిల్ క్యాప్ అందించడంతో ఈ కార్యక్రమం మరింత ప్రత్యేకతను సంతరించుకుంది’ అని ఈ లిటిల్ మాస్టర్ వ్యాఖ్యానించాడు. గవాస్కర్‌కు క్యాప్‌ను బహుకరించడం గొప్ప గౌవరంగా భావిస్తున్నానని కపిల్ అన్నాడు. ఇప్పటికీ సన్నీనే గొప్ప ఓపెనర్ అని తన మాజీ సహచరుడికి కితాబిచ్చాడు. ఐసీసీ చీఫ్ ఎగ్జిక్యూటివ్ హరూన్ లోర్గాట్, రమీజ్ రాజా తదితరులు ఈ కార్యక్రమంలో పాల్గొన్నారు.