Posted: 01/01/2012 02:57 PM IST

బాలీవుడ్‌లో సినిమా వసూళ్లు వందకోట్లు దాడటం అంటే... అది ‘ఖాన్’లకే సాధ్యం. ఇది ఒకప్పటిమాట. ఇప్పుడు విద్యాబాలన్ ఖాన్‌లకే ఖాన్ అనిపించుకున్నారు. ఆమె నటించిన ‘ది డర్టీ పిక్చర్’ 114 కోట్లు వసూలు చేసి బాలీవుడ్ బాక్సాఫీస్‌ని నివ్వెరపోయేలా చేసింది. మరో షాకింగ్ విషయం ఏంటంటే... ఈ సినిమా బడ్జెట్ కేవలం 18 కోట్లు. ఈ సినిమాతో అప్పటిదాకా ఓ మోస్తరు ఇమేజ్ ఉన్న విద్యాబాలన్ సూపర్‌స్టార్ అయిపోయారు. ప్రస్తుతం ఈ మలయాళ మందారం ‘డర్డీపిక్చర్’ తెచ్చిన ఆనందాన్ని ఓ రేంజ్‌లో ఎంజాయ్ చేస్తున్నారు.

ఇదిలావుంటే... ప్రస్తుతం బాలీవుడ్‌లో విద్యపై ఓ గాసిప్ షికార్లు చేస్తోంది. యూటీవీ అధినేతల్లో ఒకరైన సిద్దార్థ్‌రాయ్‌తో విద్య ప్రేమలో పడ్డారని, 14 కోట్లు విలువ చేసే ఓ అందమైన భవంతిని విద్యకు నూతన సంవత్సరకానుకగా సిద్దార్థ్ అందించారని, ముంబయ్‌లోని ‘జుహూ తారా’ అనే ఖరీదైన ఏరియాలో ఉన్న ఈ భవంతిలోకి త్వరలోనే విద్య గృహప్రవేశం చేయనున్నారని ఈ గాసిప్ సారాంశం.

ఈ విషయాన్ని విద్యాబాలన్ ముందు ప్రస్తావిస్తే... ‘‘పనికిమాలిన వార్తల గురించి ఆలోచించాల్సిన పనిలేదు. ఇవాళే కాదు, ఏడాది తర్వాత అయినా సరే... ఆ ఏరియాలో నాకు భవంతి ఉందని మీరు రుజువుచేస్తే... దాన్ని మీకు రాసిస్తా. అనవసరంగా ఇలాంటి వాటి గురించి ఆలోచించి టైమ్ వేస్ట్ చేసుకోవద్దు’’ అంటూ ఎంతో ఆవేశంగా సమాధానమిచ్చారు.