జలుబుకు చెక్ పెట్టే ఇంటి చిట్కాలు

Posted: 10/12/2015 03:48 PM IST

జలుబు.. ఇది ఒక్కసారి వచ్చిందంటే దీని నుంచి ఉపశమనం పొందడం చాలా కష్టం. ఎన్ని మందులు ఉపయోగించినప్పటికీ ఈ చిరుజబ్బు త్వరగా వదలదు. ఈ జబ్బు కారణంగా శరీరం బరువుగా, తలనొప్పి ఎక్కువగా వుండటంతోపాటు శ్వాస తీసుకోవడంలో ఇబ్బందిగా అనిపిస్తుంది. తద్వారా మనిషి నీరంగా మారిపోతాడు. మరి.. దీని నుంచి విముక్తి పొందాలంటే ఎలా? అని అనుకుంటున్నారా! కొన్ని ఇంటి చిట్కాలు పాటిస్తే త్వరగా దాని నుంచి విముక్తి పొందవచ్చునని నిపుణులు అంటున్నారు.

* జలుబును తగ్గించడంలో వెల్లుల్లి బాగా పనిచేస్తుందంటారు. వెల్లుల్లిపాయ పైపొర తీసేసి నోట్లో ఉంచుకోవాలి. తరుచుగా ఆ వెల్లుల్లిని కొరుకుతూ దాని నుంచి వచ్చే రసం మింగుతుండాలి. అలా నాలుగైదు గంటలకు ఓసారి కొత్త వెల్లుల్లిపాయను నోట్లో ఉంచుకుని రసం మింగాలి. ఇలా చేయడం వల్ల జలుబు వల్ల వచ్చే ఇబ్బంది ఒకటి రెండు రోజుల్లోనే తొలగిపోతుంది.

* జలుబు చేసినపుడు ముక్కు దిబ్బడ వల్ల ఇబ్బంది పడుతుంటే వేడి వేడి లేదా మసాలా వాడిన ఆహారాన్ని తీసుకోవాలి. అందువల్ల మూసుకుపోయిన నాసికా రంధ్రాలు తెరుచుకుంటాయి. అనవసరంగా 'నోస్ డ్రాప్స్' లాంటివి కూడా వాడే పరిస్థితి తప్పుతుంది. కొన్ని నిమిషాలపాటే శక్తి అంతా ఉపయోగించి వ్యాయామం చేసినా ఫలితం వుంటుంది. అప్పుడు మీ శరీరానికి ఆక్సిజన్ అవసరం పెరుగుతుంది. దాంతో మీరు గాఢంగా శ్వాసించడంతో జలుబు వల్ల మూసుకునే నాసికా రంధ్రాలు సహజంగానే తెరుచుకుంటాయి. ఛాతీ దగ్గర ఇబ్బంది కూడా తొలిగిపోతుంది.

* తడిగా ఉన్న తలతో ఫ్యాన్ కింద కూర్చోవడం, వాహనాలలో ప్రయాణించేటపుడు ముక్కుకు కాటన్ వస్త్రాన్ని కట్టుకోవాలి. ప్రతిరోజు పది నిమిషాల పాటు సూర్య కిరణాలు మీపై పడేలా కూర్చుంటే సరిపోతుంది.  బయట ఆహార పదార్ధాలు తింటే ఓ గ్లాసు గోరువెచ్చని నీటిని త్రాగండి. నిద్ర పోయేప్పుడు మీ తలను పూర్తిగా కప్పుకోండి.

* జలుబు చేసినపుడు వేడివేడి వెనిగర్ ద్రావణం లేదా వైట్‌వైన్ వాసన పీల్చినా ఫలితం ఉంటుంది. కొన్ని నిమిషాలసేపు వాటి వాసనలు పీలిస్తే ఉపశమనం లభిస్తుంది.