నిద్రలేమికి ఉపశమనం కలిగించే మార్గాలు

Posted: 09/12/2015 02:56 PM IST

ప్రస్తుత ఆధునిక యుగంలో ఉద్యోగస్తులు నిద్రలేమి సమస్యతో బాధపడుతుంటారు. ఎక్కువసేపు ఆఫీసు పనుల్లో నిమగ్నమై వుండటం, పోషకాహారం సరైన సమయంలో తీసుకోకపోవడం వల్ల ఈ సమస్య ఎదురవుతుందని ఆరోగ్య నిపుణులు అంటున్నారు. తొలుత ఈ సమస్య అంతగా బాధించకపోయినా.. కాలక్రమంలో ఎన్నో ఇబ్బందులను తెచ్చిపెడుతుంది. కళ్లు మంటగా అనిపించడం, ఒళ్లు నొప్పులు తీవ్రం కావడం, గుండె సంబంధిత వ్యాధులు, ఇంకా ఇతర సమస్యలు చుట్టుముడుతాయి. కాబట్టి.. ఎంత వీలైతే అంత త్వరగా ఈ నిద్రలేమి నుంచి ఉపశమనం పొందాలని ఆరోగ్య నిపుణులు సూచిస్తున్నారు. ఈ సమస్య నుంచి విముక్తి పొందడానికి కొన్ని చిట్కాలు పాటిస్తే సరిపోతుంది.

రాత్రి సమయంలో నిద్రకు ఉపక్రమించే ముందు గోరువెచ్చని నీటితో స్నానం చేయాలి. ఇలా చేయడం వల్ల.. ఉదయం నుంచి అనుభవించిన మానసిక ఆవేదనలు, ఒళ్లు నొప్పులు, తలనొప్పి, ఇతరత్ర ఇబ్బందులు దూరమవుతాయి. లావెండర్, వెనిల్లా, పరిమళాలతో కూడిన స్నానం ఆచరిస్తే.. ఎంతో ప్రశాంతంగా వుంటుంది. అప్పుడు బెడ్ పై హాయిగా సేద తీర్చుకోవచ్చు. బెడ్ రూమ్ లో తక్కువ వెలుతురుతో వుండేలా చూసుకోవాలి. గది చీకటిగా వుంటే.. నిద్రలో అంతే త్వరగా జారిపోవచ్చని నిపుణులు సూచిస్తున్నారు. కొంతమందికి టీ తాగితే మనస్సు ఆహ్లాదంగా వున్నట్లు అనిపిస్తుంది. అటువంటి వారు.. నిద్రపోవడానికి గంటముందు మనస్సును సేదతీర్చే టీ త్రాగితే చాలా మంచిది. అయితే.. పడుకోవడానికి ముందు వ్యాయామాలు మాత్రం చేయకూడదని హెచ్చరిస్తున్నారు.

ఇక ఆహారం విషయానికొస్తే.. ఎముకల పటిష్టతకు దోహదం చేసే పాలపదార్థాలు, కాల్షియం బాగా ఉన్న ఆరెంజ్ జ్యూస్‌లు, చేపలు, ఆకుకూరలు, నువ్వులు, బాదాములు, చిక్కుళ్లు వంటివి రెగ్యులర్ డైట్ లో చేర్చుకోవాలని నిపుణలు చెబుతున్నారు. ఆ ఆహారాలు నిత్యం తీసుకుంటే.. వాటి ద్వారా శరీరానికి కావలసిన క్యాల్షియం, విటమిన్ డిని పొందవచ్చును. అవి.. నిద్రలో త్వరగా జారిపోవడానికి ప్రేరేపిస్తాయి.