ఆపిల్.. ఆరోగ్యానికి దివ్యౌషధం!

Posted: 06/08/2015 01:56 PM IST

ప్రకృతి సహజంగా లభించే ఫ్రూట్స్ తో ఆరోగ్యాన్ని మెరుగుపరిచే ఔషధగుణాలు పుష్కలంగా వుంటాయి. అందుకే.. వైద్యనిపుణులు వీటిని ఎక్కువగా తీసుకోవాల్సిందిగా సూచిస్తున్నారు. ముఖ్యంగా ఆపిల్ పండ్లలో ఎన్నో పోషకాలు నిల్వవుంటాయి. శరీరానికి కావలసిన పోషకాలను అందించడంతోపాటు వివిధ రకాల వ్యాధల నుంచి దూరంగా వుంచుతుంది. అందులోని ఔషధగుణాలవల్ల చాలారకాల వ్యాధుల్ని నివారించవచ్చు.

ప్రతిరోజూ కనీసం ఓ ఆపిల్ తినేవాళ్లలో మధుమేహం తక్కువేనని పరిశోధనల్లో తేలింది. ఆ వ్యాధితో బాధపడేవాళ్లు రెగ్యులర్ గా ఈ పండ్లను తీసుకుంటే ఆరోగ్యపరంగా ఎంతో మేలు జరుగుతుందని వైద్యనిపుణులు సలహా ఇస్తున్నారు. కొందరు ఆపిల్‌ తొక్క తీసేసి తింటారు. కానీ అలా తినడం చాలా దెబ్బ పడుతుందని అంటున్నారు. ఎందుకంటే.. ఆపిల్ తొక్కలో ట్రిటర్‌పినాయిడ్లు అనే పోషకాలు వుంటాయి. అవి.. కాలేయ, పేగు, రొమ్ము, క్యాన్సర్ల కణాలు పెరగుకుండా అడ్డుపడతాయి. కాబట్టి.. ఆపిల్ తొక్క తీయకుండా దానిని శుభ్రంగా కడగి నేరుగా తీసుకుంటే ఎంతో శ్రేయస్కరమని నిపుణులు సూచిస్తున్నారు.

ఇక ఆపిల్ జ్యూస్ విషయానికొస్తే.. దానిలో అల్జీమర్స్‌ని నిరోధించే శక్తి ఉంది. మెదడులోని ఎసిటైల్ కోలిన్ స్రావాన్ని పెంచడం ద్వారా న్యూరోట్రాన్స్‌మిటర్ల పనితీరును మెరుగుపరుస్తుందని ఆరోగ్య నిపుణులు అంటున్నారు. తద్వారా ఈ జ్యూస్ త్రాగడం వల్ల మెదడు చురుకుగా పనిచేస్తుంది. ఇన్ని పోషకాలు నిల్వ వుండటం వల్ల ‘ఆపిల్’ ఆరోగ్యానికి దివ్యైషంగా పేరుగాంచింది.