సరిపడా నిద్ర లేకపోతే నెత్తిమీద కొట్టినదానితో సమానం

Posted: 01/03/2014 04:59 PM IST

మనిషికి నిద్ర ఎంత ముఖ్యమో మనందరికీ తెలుసు.  నిద్రలేమి వలన కళ్ళకింద చారలు, చురుకుదనం తగ్గిపోవటం లాంటివి సామాన్యంగా తెలిసినవి. 

అయితే శాస్త్రవేత్తలు చేసే ప్రయోగాలు, పరిశోధనలు వ్యక్తిగతమైన అభిప్రాయాలలా కాకుండా శాస్త్రోక్తంగా ఉంటాయి, హేతుబద్ధమైన సూత్రీకరణలు జరుగుతాయి కానీ ఒక నమ్మకాన్ని బలపరచటానికో లేక వ్యతిరేకించటానికో కాదు కదూ. 

స్వీడన్ లో ఉప్సలా విశ్వవిద్యాలయంలో న్యూరోసైన్స్ విభాగంలో నిద్ర పరిశోధకుడు క్రిస్టియన్ బెనెడిక్ట్ నిర్వహించిన పరిశోధనలో, రాత్రంతా నిద్రను పోగొట్టుకుని ఉన్నవారిలో తెల్లవారేసరికల్లా రక్త కణాలలోంచి ఎన్ ఎస్ ఇ, ఎస్ 100 బి మాలిక్యూల్స్ ని పెంచటం గమనించారు.

15 మంది సాధారణ శారీరక సౌష్టవం ఉన్న మనుషుల మీద ఈ పరిశోధన జరిగింది.  నిద్రలేమి వలన మెదడు స్ధబ్ధుగా అవటంతో శరీరంలోని రక్తంలో ఈ మాలిక్యూల్స్ ఏర్పడ్డట్టుగా పరిశోధకులు తెలుసుకున్నారు.  సరిపడా నిద్ర లేకపోవటంతో న్యూరో డిజెనరేటివ్ ప్రాసెస్ ని కలిగిస్తుందని క్రిస్టియన్ బెనెడిక్ట్ అన్నారు. 

పరిశోధన సారాంశమేమిటంటే మెదడు ఆరోగ్యానికి రాత్రిపూట పోయే సుఖనిద్ర బాగా దోహదం చేస్తుంది.  నిద్రను పోగొట్టుకుని ఉండేవాళ్ళ మెదడు మీద దాని ప్రభావం బాగా పడుతుందని, నిద్ర లేమి తల మీద కొట్టినంత ప్రభావాన్ని కలిగిస్తుందని కూడా తెలియజేసారు.

-శ్రీజ