కొరియా మాస్టర్ టోర్నీపై కిదాంబి నజర్.. సైనా దూరం..

Posted: 11/18/2019 06:43 PM IST

గాయాలతో గత కొంతకాలం ఆటకు దూరమైన భారత షట్లర్‌ కిదాంబి శ్రీకాంత్‌ కొరియా మాస్టర్‌ వరల్డ్‌ టూర్‌ 300 లో అత్యుత్తమ ప్రదర్శన ఇచ్చేందుకు సిద్దమయ్యాడు. హాంకాంగ్ సూపర్ సిరీస్ తో ఫామ్ లోకి తిరిగి వచ్చిన శ్రీకాంత్.. మరింత పుంజుకుని కొరియా మాస్టర్ టోర్నీపై కన్నేశాడు. టైటిల్‌ ను కైవసం చేసుకోవాలని ఉవ్విళ్లూరుతున్నాడు. అయితే వరుస వైఫల్యాలతో అలసిపోయిన సీనియర్‌ షట్లర్‌ సైనా నెహ్వాల్.. టోర్నీ నుంచి తప్పుకుంది.

ఈ ఏడాది ఇండియా ఓపెన్‌ గెలిచిన శ్రీకాంత్‌ ఆ తర్వాత ఆశించిన రీతిలో రాణించలేదు. కాగా, తన ఫామ్ ను తిరిగి కొనసాగిస్తున్న కిదాంబి శ్రీకాంత్.. కొరియా ఓపెన్‌ పురుషుల సింగిల్స్‌ తొలిరౌండ్లో అతడు వాంగ్‌ వింగ్‌ కి విన్సెంట్‌ (హాంకాంగ్‌)తో తలపడనున్నాడు. ప్రత్యర్థితో ఇప్పటికే పలుమార్లు పోటీపడిన శ్రీకాంత్ 10 పర్యాయాలు పైచేయి సాధించాడు. కాగా ప్రత్యర్థి మాత్రం కేవలం మూడు పర్యాయాలు మాత్రమే శ్రీకాంత్ తో తలపడి నిలదొక్కకున్నాడు.

తొలిరౌండ్ నుంచి పలు టోర్నీలలో విఫలమవుతూ వస్తున్న ప్రపంచ నంబర్‌ 9 క్రీడాకారిణి సైనా నెహ్వాల్‌.. కొరియా ఓపెన్‌ నుంచి తప్పుకుంది. వచ్చే వారం లక్నోలో నిర్వహించే సయ్యద్‌ మోదీ టోర్నీలో ఆమె పాల్గొనే అవకాశం ఉంది. సైనా తప్పుకోవడంతో ఇక టోర్నీలో భారత మహిళల ప్రాతినిధ్యం లేనట్టే. కాగా, భారత యువ ఆటగాడు, ప్రపంచ నంబర్‌ 16వ ర్యాంకర్‌ సమీర్‌ వర్మ పురుషుల తొలి రౌండ్లో టాప్ సీడ్‌ షి యు కి (చైనా)తో తలపడనున్నాడు. అతడి సోదరుడు సౌరభ్‌ వర్మ అర్హత పోటీల్లో ఆడనున్నాడు.