కొరియా ఓపెన్ ను ప్రధానికి అంకితమిచ్చిన సిందూ

Posted: 09/18/2017 06:18 PM IST

కొరియా ఓపెన్ సూపర్ సిరీస్ టోర్నమెంటులో భారత అగ్రశ్రేణి షట్లర్, ఒలింపిక్‌ పతక విజేత, తెలుగు తేజం పీవీ సింధు టైటిల్ సాధించి తన ప్రత్యర్థిపై ప్రతీకారం తీర్చుకుంది. ఈ విజయాన్ని ఏకంగా దేశ ప్రధాని నరేంద్రమోడీకి అంకితమిచ్చింది. 22 ఏళ్ల ఈ హైదరాబాదీ.. క్రితం రోజున ప్రపంచ బ్యాడ్మింటన్ ఛాంపియన్‌ జపాన్ కు చెందిన ఒకుహరను మట్టికరిపించి కొరియా ఓపెన్‌ సిరీస్‌ టైటిల్‌ దక్కించుకుని తన ప్రపంచ ఛాంపియన్ షిఫ్ పోటీ ఫైనల్ పోరు.. ప్రతికారాన్ని కూడా తర్చుకున్న విషయం తెలిసిందే. ఈ టైటిల్‌ చేజిక్కించుకున్న తొలి భారత షట్లర్ గా రికార్డు సృష్టించింది.

ఈ నేపథ్యంలో భారత ప్రధాని నరేంద్ర మోదీ ట్విటర్‌ ద్వారా సింధుకు శుభాకాంక్షలు తెలిపారు. ‘కొరియా ఓపెన్ సూపర్ సిరీస్ గెలిచిన సింధుకు అభినందనలు. ఆమె విజయం దేశానికి గర్వకారణం’ అని మోదీ పేర్కొన్నారు. మోదీ ట్వీట్‌కు స్పందించిన పీవీ సింధు.. ఈ విజయం ప్రధాని జన్మదినం రోజున సాధించడంతో.. దానిని నరేంద్రమోడీకే అంకితమిస్తున్నానని ట్విట్టర్ ద్వారా వెల్లడించింది. ఏ మాత్రం అలసట లేకుండా దేశానికి ఆయన అందిస్తోన్న సేవలు చిరస్మరణీయమని సింధు పేర్కొంది.