‘‘ధోనితో సెటైర్లా’’.. నెట్టింట్లో మాలిక్ కు తలంటు..

Posted: 12/27/2019 07:51 PM IST

పాకిస్థాన్‌ బ్యాట్స్‌మన్‌ షోయబ్‌ మాలిక్‌ను టీమిండియా మాజీ కెప్టెన్‌ ఎంఎస్‌ ధోనీ అభిమానులు ట్విటర్‌లో ఓ ఆట ఆడేసుకున్నారు. 2012, డిసెంబర్ 25న టీమిండియాపై పాక్‌ విజయం సాధించిన ఫొటోను మాలిక్‌ పోస్ట్‌ చేస్తూ.. ‘‘ స్నేహితులకు డిసెంబర్ 25, క్రిస్మస్‌ శుభాకాంక్షలు’’ అని ట్వీట్‌ చేశాడు. ఆ ఫొటోలో మాలిక్‌ విజయానందంలో ఉండగా ధోనీ అతడి పక్కన ఉన్నాడు. ఈ ట్వీట్‌పై ఆగ్రహించిన ధోనీ అభిమానులు మాలిక్‌ను ట్రోల్ చేయడం ఆరంభించారు.

అతడు డకౌట్‌గా వెనుదిరగడం, పాక్‌పై 2007 టీ20 ప్రపంచకప్‌ గెలవడం, క్లీన్‌బౌల్డ్‌ అవ్వడం, ధోనీ చేతిలో స్టంపౌటయ్యే ఫొటోలను పెట్టి అభిమానులు కామెంట్లు చేస్తున్నారు. 2012లో పాక్‌తో జరిగిన రెండు టీ20ల సిరీస్‌ను భారత్‌ 1-1తో సమం చేసింది. డిసెంబర్‌ 25న జరిగిన తొలి టీ20లో టీమిండియా ఐదు వికెట్ల తేడాతో ఓటమిపాలైంది. రెండో టీ20లో భారత్‌ చెలరేగి పాక్‌ను 11 పరుగుల తేడాతో మట్టికరిపించింది.