మ్యాచ్ లో ధోని ఇచ్చే సలహాలపై కుల్దీప్ ఏమన్నాడంటే..

Posted: 03/09/2019 08:25 PM IST

Kuldeep yadav says dhoni knows everything about a batsman opens up about tips during matches

భారత మాజీ కెప్టెన్ మహేంద్రసింగ్‌ ధోనీ ఇచ్చే టిప్స్ మ్యాచ్‌లో తనకు ఎంతగానో ఉపయోగపడుతున్నాయని మణికట్టు స్పిన్నర్ కుల్దీప్ యాదవ్ వెల్లడించాడు. ఆస్ట్రేలియాతో రాంచీ వేదికగా శుక్రవారం రాత్రి ముగిసిన మూడో వన్డేలో ఉస్మాన్ ఖవాజా (104) -అరోన్ ఫించ్ (93) ఓపెనింగ్ జోడీ భాగస్వామ్యాన్ని విడదీసేందుకు భారత్ తీవ్రంగా శ్రమిస్తున్న వేళ.. ఇన్నింగ్స్ 32వ ఓవర్‌ వేసిన కుల్దీప్ యాదవ్‌ తెలివైన బంతితో ఫలితం రాబట్టాడు.

ధోనీ సూచనల మేరకు మిడిల్ స్టంప్‌ను లక్ష్యంగా చేసుకుని కుల్దీప్ బంతి విసరగా.. ఫించ్ ఎల్బీడబ్ల్యూగా ఔటయ్యాడు. ఈ మ్యాచ్‌లో 10 ఓవర్లు బౌలింగ్ చేసిన ఈ మణికట్టు స్పిన్నర్ 64 పరుగులిచ్చినా.. కీలకమైన మూడు వికెట్లు పడగొట్టాడు. అయితే.. ఈ మ్యాచ్‌లో భారత్ 32 పరుగుల తేడాతో ఓడిపోయిన విషయం తెలిసిందే.

మ్యాచ్ సమయంలో ధోనీ సలహాలు, సూచనలు గురించి తాజాగా కుల్దీప్ యాదవ్ మాట్లాడుతూ ‘మహేంద్రసింగ్‌ ధోనీతో కలిసి ఆడటం చాలా సరదాగా ఉంటుంది. మ్యాచ్‌ సమయంలో అతను కొన్ని సూచనలు చేస్తుంటాడు. అయితే.. అవి కొన్నిసార్లు మంచి ఫలితాన్నిస్తాయి. మరికొన్నిసార్లు విఫలమవ్వచ్చు. కానీ.. ధోనీపై ఉన్న గౌరవం మాత్రం తగ్గదు. అతనికి అన్నీ తెలుసు. ఒక్కోసారి ప్రత్యర్థి బ్యాట్స్‌మెన్‌ గురించి చిన్న విషయాలు కూడా మనకు తెలియకపోవచ్చు. కానీ.. ధోనీకి మాత్రం తెలుసుంటాయి’ అని వెల్లడించాడు. భారత్, ఆస్ట్రేలియా మధ్య నాలుగో వన్డే మొహాలి వేదికగా ఆదివారం మధ్యాహ్నం 1.30 గంటల నుంచి జరగనుంది.