హెడ్ కోచ్: అటగాళ్ల అభిప్రాయాలను తెలుసుకోనున్న బిసిసిఐ

Posted: 07/06/2017 08:49 PM IST

టీమిండియా ప్రధాన కోచ్ అనిల్ కుంబ్లే పదవీ కాలం ముగిసినా అతన్ని పునర్ నియామకం చేస్తామని.. క్రికెటర్ల నుంచి వచ్చిన ఒత్తిడి నేపథ్యంలో డైలిమాలో పడిన బిసిసిఐ.. తాత్సర ధోరణి అవలంబించడంతో.. కుంబ్లే స్వతహాగా కోచ్ పదవికి రాజీనామా చేసి వెళ్లిపోయారు. ఈ తరుణంలో బిసిసిఐ మరోమారు టీమిండియా కోచ్ పదవికి ధరఖాస్తులను అహ్వానించింది. అయితే మరోమారు కోచ్ అనీల్ కుంబ్లే లాంటి పరాభవం ఎమరెవరికీ ఎదురుకాకూడదని భావించి.. టీమిండియా అటగాళ్ల సూచనల మేరకే కోచ్ ను ఎంపిక చేయాలని భావిస్తుంది.

జూలై 10వ తేదీ తర్వాత టీమిండియాకు హెడ్ కోచ్ ను బీసీసీఐ ప్రకటించనుంది. ఈ విషయాన్ని క్రికెట్ అడ్వైజరీ కమిటీలో సభ్యుడైన సౌరవ్ గంగూలీ ఇప్పటికే ప్రకటించాడు. ఇప్పటికే కోచ్ ఎంపికపై పెద్ద కసరత్తే జరిగింది. అయితే, కోచ్ ఎంపికకు సంబంధించి ఆటగాళ్ల అభిప్రాయాలను కూడా తీసుకుంటే బాగుంటుందని బీసీసీఐ భావిస్తోంది. ఇదే విషయంపై కెప్టెన్ కోహ్లీ స్పందిస్తూ, తమను సంప్రదిస్తే ఆటగాళ్లందరం కలసి అభిప్రాయాన్ని చెబుతామని చెప్పాడు. ఆటగాళ్లందరిదీ ఒకే అభిప్రాయం ఉంటుందని తెలిపాడు.

ఈ నేపథ్యంలో బీసీసీఐ సీఈవో రాహుల్ జోహ్రీ జమైకాకు వెళ్లారు. ఈ సాయంత్రం టీమిండియా ప్లేయర్లతో ఆయన భేటీ అయి, హెడ్ కోచ్ పై వారి అభిప్రాయాలను సేకరించనున్నారు. ప్రస్తుతం కోచ్ పదవి కోసం రవిశాస్త్రి, సెహ్వాగ్, టామ్ మూడీల మధ్య పోటీ నెలకొంది. అయితే, టీమిండియా డైరెక్టర్ గా పని చేసిన అనుభవం రవిశాస్త్రికి లాభించనుందని తెలుస్తోంది. ఇక అటగాళ్లు కూడా రవిశాస్త్రి వైపే మొగ్గు చూసుతున్నారని సమాచారం. ఇప్పటికే ఈ విషయంలో రవిశాస్త్రీకే అధికంగా అవకాశాలున్నాయని టీమిండియా దిగ్గజం సునీల్ గవాస్కర్ కూడా వ్యాఖ్యనించారు.