రికార్డు బౌలింగ్ తో రంగనా హెరత్ హ్యాట్రిక్..

Posted: 08/05/2016 05:17 PM IST

Rangana herath becomes second sri lankan to claim test hat trick

శ్రీలంక పర్యటనలో భాగంగా ఆతిధ్యజట్టుతో మూడు టెస్టుల సీరిస్ లో తొలిటెస్టు ఓడిన ఆస్ట్రేలియా రెండో టెస్టులో బాగా రాణించి విజయాన్ని అందుకోవాలని భావించింది. అయితే అసీస్ కు పూర్తి భిన్నంగా రెండో టెస్టు కూడా సాగుతుంది. రెండో టెస్టు తొలి ఇన్నింగ్స్ లో కేవలం 106 పరుగులకు లంకేయులను కట్టడి చేసిన లంకేయులు.. అదే దూకుడుతో ముందుకు దూసుకెళ్తున్నారు. అంతకుముందు తొలి ఇన్నింగ్స్ లో 281 పరుగులకు శ్రీలంక అలౌట్ అయ్యింది.

అయితే రెండో ఇన్నింగ్స్ లో 237 పరుగులకు లంకేయులు అలౌట్ అయ్యారు. దీంతో రెండు టెస్టు రెండో ఇన్నింగ్స్ లో 413 విజయలక్ష్యంతో బరిలోకి దిగిన అసీస్ ను రంగనా హెరత్ తన రికార్డు బౌలింగ్ తో కంగారెత్తించాడు. సెకండ్ టెస్ట్ మ్యాచ్‌లో మూడు వరుస బంతులకు బోల్తాపడ్డారు కంగారులు. శ్రీలంక బౌలర్ రంగనా హెరాత్ టెస్ట్ క్రికెట్‌లో హ్యాట్రిక్ సాధించి ఆసిస్ ఆటగాళ్లను ముంచేశాడు. హెరాత్‌కు ఇది తన కెరీర్‌లో మొదటి టెస్ట్ హ్యాట్రిక్ కాగా, శ్రీలంక తరుపున ఈ ఘనత సాధించిన రెండో బౌలర్‌గా రికార్డు సృష్టించాడు.

అంతకుముందు నువాన్ జోయ్‌సా మాత్రమే టెస్టు మ్యాచ్‌లలో హ్యాట్రిక్ సాధించిన ఏకైక శ్రీలంక బౌలర్. 1999లో జింబాబ్వే జట్టుపై హ్యాట్రిక్ ఫీట్‌ను సాధించాడు నువాన్. అయితే మళ్లీ ఇన్నాళ్లకు హెరాత్ ఆ ఘనత సాధించాడు. ఆసిస్‌తో జరిగిన సెకండ్ టెస్ట్‌లో వరుసగా ఆడమ్ వోగ్స్(8), పీటర్ నెవిల్(0), మిచెల్ స్టార్క్‌(0)లను పెవిలియన్‌కు పంపించాడు స్పిన్ మాంత్రికుడు రంగానా హెరాత్. దీంతో ఆరు ఓవర్లలో 25 పరుగులు సాధించిన అసీస్ మూడు టాప్ అర్ఢర్ వికెట్లు కోల్పోయి పీకల్లోతు కష్టాల్లో పడింది.