ఆల్ స్టార్స్ లీగ్ క్లీన్ స్వీప్ చేసిన వార్న్ వారియర్స్

Posted: 11/15/2015 03:48 PM IST

Sachin s blaster s were swept aside 3 0 by warne s warriors

ఆల్ స్టార్ టి20 క్రికెట్ సిరీస్ లో తొలి రెండు మ్యాచ్ లను పరాజయం పాలైన సచిన్ బ్లస్టర్ జట్టు చివరి టీ-20లోనూ ఓటమిని చవిచూసి.. వార్న్ వారియర్స్ చేతిలో క్లీన్ స్పీప్ చేయబడింది. కనీసం చివరి మ్యాచ్ లోనైనా సచిన్ బ్లాస్టర్స్ గెలుస్తుందని ఆశించిన అభిమానుల అంచాలనాలను తలకిందులు చేస్తూ.. పరాజయం పాలైంది. చివరి మ్యాచ్లో మాస్టర్ బ్లాస్టర్ సచిన్ టెండూల్కర్, సౌరవ్ గంగూలీ చెలరేగి అర్థ శతకాలతో రాణించినా నిష్పలంగానే మారింది. దీంతో ఆల్ స్టార్ టి20 క్రికెట్ సిరీస్ ను షేన్ వార్న్ సేన 3-0తో క్లీన్ స్వీప్ చేసింది.

ఉత్యంఠభరితంగా జరిగిన చివరి మ్యాచ్ లో సచిన్ బ్లాస్టర్స్ పై వార్న్ వారియర్స్ 4 వికెట్ల తేడాతో విజయం సాధించింది. బ్లాస్టర్స్ నిర్దేశించిన 220 పరుగుల లక్ష్యాన్ని మరొక బంతి మిగులుండగానే చేరుకుంది. 19.1 ఓవర్లలో 6 వికెట్లు నష్టపోయి 224 పరుగులు చేసింది. చివరి 2 బంతుల్లో 2 పరుగులు చేయాల్సిన దశలో షేన్ వార్న్ సిక్సర్ కొట్టి జట్టుకు విజయాన్ని అందించాడు. సంగక్కర 42 (21 బంతుల్లో 4 ఫోర్లు, 3 సిక్సర్లు), కల్లిస్ 47 (23 బంతుల్లో 4 ఫోర్లు, 4 సిక్సర్లు), పాంటింగ్ 43 (25 బంతుల్లో 3 ఫోర్లు, 2 సిక్సర్లు) చెలరేగారు. సైమండ్స్ 31, హేడన్ 12, జాంటి రోడ్స్ 17 పరుగులు చేశారు. స్వాన్ 2 వికెట్లు పడగొట్టాడు. ఆంబ్రోస్, హూపర్, సెహ్వాగ్ తలో వికెట్ తీశారు.

అంతకుముందు టాస్ గెలిచి ముందుగా బ్యాటింగ్ చేసిన సచిన్ బ్లాస్టర్స్ 20 ఓవర్లలో 5 వికెట్లు కోల్పోయి 219 పరుగులు చేసింది. తమ ప్రత్యర్థి వార్న్ వారియర్స్ ముందు 220 పరుగుల విజయ లక్ష్యాన్ని నిర్దేశించింది. సచిన్ 27 బంతుల్లో 2 ఫోర్లు, 6 సిక్సర్లతో 56 పరుగులు సాధించాడు. గంగూలీ 37 బంతుల్లో 3 ఫోర్లు, 3 సిక్సర్లతో 50 పరుగులు చేశాడు. సెహ్వాగ్ 27, జయవర్ధనే 41, హూపర్ 33 పరుగులు సాధించారు. వారియర్స్ బౌలర్లలో వెటోరి 3 వికెట్లు పడగొట్టాడు. సైమండ్స్, వాల్ష్ చెరో వికెట్ దక్కించుకున్నారు.

జి. మనోహర్