షారుఖ్ కు షాక్.. ఈడీ నోటీసులు..

Posted: 05/13/2015 11:02 AM IST

బాలీవుడ్ బాద్ ‘షా’రుఖ్ ఖాన్ కు ఎన్ఫోర్స్ మెంట్ డైరెక్టరేట్ షాకిచ్చింది. క్రికెట్ సంబంధిత వ్యవహారాల నేపథ్యంలో ఆయనపై విదేశీ మారక ఉల్లంఘన ఆరోపణలు వున్నట్లు ఈడీ వెల్లడించింది. దీంతో అతనికి నోటీసులు జారీ చేసినట్లుగా ఈడీ తెలిపింది. సినీపరిశ్రమకు చెందిన షారుఖ్ కు క్రికెట్ తో సంబంధం ఏంటి? అని అనుకుంటున్నారా! ఇంతకీ ఈడీ ఏ విషయంలో నోటీసులు జారీ చేసింది? అని సందేహంలో మునిగిరా? ఆ వ్యవహారాలు తెలియాలంటే మేటర్ లోకి వెళ్లాల్సిందే!

ఐపీఎల్ సీజన్ మొదలైనప్పటికీ నుంచి క్రికెట్ కోల్ కత్తా నైట్ రైడర్స్ జట్టుకు షారుఖ్ యజమానిగా కొనసాగుతూ వస్తున్న విషయం తెలిసిందే! గత ఏడు సీజన్లలో ఈ జట్టుకి సంబంధించి ఎటువంటి ఇబ్బందులు ఎదుర్కోని ఆయన.. ఎనిమిదో సీజన్ లో మాత్రం అనుకోకుండా ఓ సమస్యలో ఇరుక్కుపోయారు. ఆ జట్టు ఆర్థిక లావాదేవీల్లో అవకతవకలు జరిగాయని ప్రాథమిక ఆధారాలు లభ్యమయ్యాయని.. అందుకే అతనికి నోటీసులు జారీ చేసినట్లుగా ఈడీ అధికారి ఒకరు వెల్లడించారు. ఈ నెలాఖరులోగా తనపై జారీ అయిన నోటీసులకు షారుఖ్ సమాధానం చెప్పాలని కోరినట్లు ఆయన స్పష్టం చేశారు.