ఢిల్లీ ముందు చాపచుట్టేసిన ధోనీసేన

Posted: 05/13/2015 11:11 AM IST

Delhi dare devils cricket team won the match against chennai super kings

ఐపీఎల్-8 సీజన్ లోనూ ధోనీసేన తన జైత్రయాత్రను కొనసాగిస్తూ పాయింట్ల పట్టికలో అగ్రస్థానంలో నిలిచింది. తమ అధ్భుత బ్యాటింగ్ తో పరుగుల వర్షాన్ని కురిపించే బ్యాట్స్ మెన్లు, దిగ్గజ ఆటగాళ్లను పవెలియన్ చేర్పించే బౌలర్లు, బ్యాట్స్ మెన్లను తన స్వింగ్ తో కన్ఫ్యూజ్ చేసే స్పిన్నర్లు, ఇక ధోనీలాంటి కూల్ కెప్టెన్ వుండటం వల్ల చెన్నై జట్టు అలవోకగా విజయాలబాటవైపు పరుగులు పెడుతోంది. అటువంటి ఈ ‘ఆల్-రౌండర్’ జట్టును ఢిల్లీ ముచ్చెమటలను పట్టించడమే కాకుండా ఓటమి ఎలా వుంటుందో రుచి చూపించింది.

ఐపీఎల్-8లో భాగంగా మంగళవారం రాత్రి జరిగిన మ్యాచ్ లో ఢిల్లీ జట్టు చెన్నై మీద భారీ విజయాన్ని నమోదు చేసుకుంది. ఢిల్లీ బౌలర్ల ధాటికి చెన్నై సూపర్ కింగ్స్ ఆటగాళ్లు విలవిల్లాడారు. పరుగులు రాబట్టేందుకు బాగానే చెమటోడ్చారు కానీ ఫలితం దక్కలేదు. దీంతో ఈ జట్టు కేవలం 119 స్వల్ప పరుగులకే చాపచుట్టేసింది. టాస్ గెలిచిన ధోనీ బ్యాటింగ్ ఎంచుకోగా.. నిర్ణీత 20 ఓవర్లలో 6 వికెట్ల నష్టానికి చెన్నై 119 పరుగులు చేసింది. డుప్లెసిస్(29), ధోనీ(27) మినహా మిగిలిన బ్యాట్స్ మెన్లు ఢిల్లీ బౌలర్ల ధాటికి స్వల్ప స్కోరుకే పవెలియన్ చేరారు. ఇక ఢిల్లీ బౌలర్ల విషయానికొస్తే.. జహీర్ ఖాన్, అల్బీ మోర్కెల్ పదునైన బౌలింగ్ తో చెలరేగారు.

ఇక 120 పరుగుల విజయలక్ష్యంతో బరిలోకి దిగిన ఢిల్లీ జట్టు.. 16.4 ఓవర్లలోనే 4 వికెట్లు కోల్పోయి టార్గెట్ ను ఛేదించింది. ఢిల్లీ ఓపెనర్ శ్రేయాస్ అయ్యర్ మరోసారి చెలరేగాడు. 49 బంతుల్లో 10 ఫోర్లు, ఓ సిక్స్ సహాయంతో అతగాడు 70 పరుగులు సాధించాడు. ఇక అత్యంత ఖరీదైన ఆటగాడు యువరాజ్(32) కూడా రాణించడంతో ఢిల్లీ విజయం సాధించింది.