అబ్బే.. నాకంతా సమయం లేదండి!

Posted: 05/07/2015 10:21 AM IST

Yuvraj singh dull performance ipl 8 season updates

గతంలో ఫామ్ కోల్పోయిన నేపథ్యంలో యువరాజ్ కి వరల్డ్ కప్ లో ఆడేందుకు ఇండియా జట్టులో స్థానం లభించని విషయం తెలిసిందే! దీంతో ఇతగాడు నానాకష్టాలు పడి రంజీ ట్రోఫీల్లో తిరిగి ఫామ్ లోకొచ్చాడు. భారీ షాట్లతో మైదానంలో పరుగుల వర్షాన్ని కురిపించి తన సత్తా చాటుకున్నాడు. ఈ విధంగా ఇతని ప్రదర్శనను చూసి ఐపీఎల్-8 సీజన్ లో భాగంగా ఢిల్లీ ఫ్రాంచైజీ వర్గాలు భారీ మొత్తం (రూ.16 కోట్లు) ముట్టజెప్పి కొనుగోలు చేసింది. ఈసారి జరిగే ఐపీఎల్ లో ఇతడు అద్భుతంగా రాణిస్తాడని యావత్ క్రికెట్ అభిమానులూ ఆశించారు.

కానీ.. అలా ఏమీ జరగలేదు. ఒకటి, రెండు మ్యాచులు మినహా మిగతా మ్యాచులన్నింటిలోనూ యువీ పేలవ పెర్ఫార్మెన్స్ తో రాణిస్తూ వస్తున్నాడు. దీంతో ఇతని మీద తీవ్ర విమర్శలు రావడం మొదలయ్యాయి. ఒకప్పుడు యువీ బెస్ట్ అని నినాదాలు చేసినవారే ఇప్పుడు అతనిని వేస్ట్ అంటూ పేర్కొంటున్నారు. తన ప్రతిభను నిరూపించుకోవడం కోసం యువీ బాగానే ప్రయత్నాలు చేశాడు కానీ ఫలితం లేకపోయింది. మొన్న ముంబైతో జరిగిన మ్యాచులో యువీ 44 బంతుల్లో 57 పరుగులు చేసినా.. ఢిల్లీ జట్టు పరాజయం పాలయ్యింది. ఢిల్లీ ఈ విధంగా పరాజయం పాలవడం వెనుక యువీ పేలవ పెర్ఫార్మెన్సేనంటూ తీవ్ర ఆరోపణలు వెల్లువెత్తాయి.

‘ఈ విధంగా విమర్శలు వస్తున్నాయి కదా.. మరి వాటిపై మీ స్పందనేంటి?’ అని యువీని ప్రశ్నిస్తే.. వాటిని పట్టించునేంత సమయం తనకు లేదంటూ ధీమాగా సమాధానమిచ్చాడు. ఈ సందర్భంగా యువీ మాట్లాడుతూ.. ‘తనపై వస్తున్న విమర్శలకు బ్యాటుతోనే సమాధానం చెబుతానే తప్ప.. వాటి గురించి ఆలోచించేంత సమయం కేటాయించలేను’ అంటూ వెల్లడించాడు. అలాగే ముంబై చేతిలో ఓడిన మ్యాచ్ గురించి తెలుపుతూ.. ఆరోజు వరుణుడు తమ విజయావకాశాలపై ప్రభావం చూపాడని అన్నాడు.