ధోనీ రావణుడే.. యువీ తండ్రి యోగి సంచలన వ్యాఖ్యలు

Posted: 04/07/2015 08:30 PM IST

Yuvraj father yograj singh controversial comments on mahendra singh dhoni

భారతీయ క్రికెట్ టీమ్ సారథి మహేంద్రసింగ్ ధోనీ మీద యువరాజ్ సింగ్ తండ్రి, మాజీ క్రికెటర్ యోగ్రాజ్ సింగ్ మరోసారి సంచలన వ్యాఖ్యలు సంధించారు. ఇటీవలే జరిగిన వరల్డ్ కప్ లో భాగంగా భారత జట్టులో తన కొడుకు యువరాజ్ కు చోటు దక్కకపోవడానికి ధోనీయే కారణమని యోగరాజ్ ఆరోపించిన విషయం తెలిసిందే! ధోనీ పన్నాగం పన్ని కావాలనే యువీకి జట్టులో స్థానం దక్కకుండా చేశాడని ఆయన ఇదివరకే మండిపడ్డారు. ఇప్పుడు తాజాగా ఇచ్చిన ఇంటర్వ్యూలో భాగంగా ధోనీని రావణాసురుడితో పోల్చుతూ అతనిమీదున్న అసంతృప్తిని వెళ్లగక్కారు.

ఈ నేపథ్యంలోనే ధోనీని రావణాసురుడితో యోగరాజ్ పోల్చుతూ.. 'ధోనీ దురహంకారి. ఇలాగే అహంకారంతో విర్రవీగిన రావణుడి కథ ముగిసింది. ధోనీ కూడా ఏదో ఒక రోజు మూల్యం చెల్లించక తప్పదు. రావణుడి కంటే గొప్పవాడని ధోనీ భావిస్తున్నాడు. అలా భావించిన ధోనీ రావణాసురుడిలాగే కుప్పకూలిపోతాడు. ఇతర క్రికెటర్లు ధోనీ గురించి నా వద్దకు వచ్చి చెప్పునప్పుడు నేను చాలా సిగ్గుపడేవాడిని. అసూయవల్ల ధోనీ అంటే వారికి పడేదికాదని మొదట్లో అనుకునేవాడ్ని కానీ.. ఎప్పుడైతే ఇతర క్రికెటర్లు అతని గురించి చెప్పారో.. అతనిలాంటి ఘోరమైన వ్యక్తిని నా జీవితంలో చూడలేదని అనుకుంటున్నాను’ అని అన్నారు.

అలాగే.. ‘2011 ప్రపంచ కప్లో యువరాజ్ను ఆపి ధోనీ బ్యాటింగ్కు వెళ్లి హీరో అయ్యాడు. 2015 ప్రపంచ కప్ సెమీస్లో ధోనీ నాలుగో స్థానంలో ఎందుకు బ్యాటింగ్కు దిగలేదు' అని యోగరాజ్ విమర్శించారు. ‘నిజంగా.. ధోనీ చేసిందేమీ లేదు. మీడియా వల్లే ధోనీ క్రికెట్ దేవుడయ్యాడు. మీడియా ధోనీని గొప్పగా చిత్రీకరించింది. కానీ ఇప్పుడు మీడియా ముందు కూర్చొని మీడియా వ్యక్తులనే అవహేళన చేస్తున్నాడు. తనకు ఎనలేని హైప్ తెచ్చిపెట్టిన మీడియాపైనే పరిహాసమాడుతున్నాడు. ఒకవేళ నేనే గనుక మీడియా వ్యక్తినైతే.. అక్కడే ధోనీ చెంప పగలకొడతా’ అని యోగ్రాజ్ ఘాటుగా వ్యాఖ్యానించారు.