ఐపీఎల్ చైర్మన్ గా రాజీవ్ శుక్లా.. అధికారికంగా వెల్లడించనున్న బీసీసీఐ

Posted: 04/06/2015 11:18 AM IST

ఇండియన్ ప్రీమియర్ లీగ్(ఐపీఎల్) చైర్మన్ పీఠం మరోమారు కేంద్ర మాజీ మంత్రి రాజీవ్ శుక్లాను వరించనుంది. ఈ పదవిని ఆశిస్తున్నవారిలో రాజీవ్ శుక్లా ముందువరుసలో కొనసాగుతున్నారు. ఈ మేరకు బీసీసీఐ త్వరలోనే తన నిర్ణయాన్ని అధికారికంగా ప్రకటించనున్నట్లు సమాచారం. ఈ పదవి కోసం పోటీ పడిన ముగ్గురు ఎవరూ.. స్పష్టమైన అధిక్యత కనబర్చకపోవడంతో.. రాజీవ్ శుక్లాను ఈ పదవికి ఎంపిక చేసేందుకు బీసీసీఐ నిర్ణయించినట్లు సమాచారం. రాజీవ్ శుక్లా తదుపరి ఐపీఎల్ చైర్మన్ అని బీసీసీఐ కార్యవర్గ సభ్యుడు తెలిపారు. ప్రస్తుతం ఈ పదవిలో కోనసాగుతున్న రంజీబ్ బిస్వాల్ ను పక్కకు జరిపి రాజీవ్ శుక్తా ఈ స్థానాన్ని అక్రమించనున్నారు.

గత నెలలో ఐపీఎల్ కోశాధికారి పదవికి పోటీ చేసిన రాజీవ్ శుక్లా శ్రీనివాసన్ మద్దతుదారు అనిరుధ్ చౌధురి చేతిలో ఓడిపోయారు. దాంతో ఇప్పుడు ఐపీఎల్ అధ్యక్ష పీఠంపై కన్నేశారు. ఈ పదవికి బీసీసీఐ అధ్యక్షుడు జగ్ మోహన్ దాల్మియా మద్దతు కలిగిన టీమిండియా మాజీ కెప్టన్ సౌరవ్ గంగూలీ, మాజీ బిసీసీఐ అధ్యక్షుడు ఎన్ శ్రీనివాసన్ మద్దతు కలిగిన  రంజీబ్ బిస్వాల్, మాజీ కేంద్ర మంత్రి శరద్ పవార్ మద్దత్తుతో అజయ్ షిర్కే ఈ పదవికి పోటీ పడ్డారు. అయితే ఈ ముగ్గురు.. తమ అధిక్యతను స్పష్టంగా చూపిడంలో విఫలమయ్యారు. దీంతో అవకాశం రాజీవ్ శుక్లాను వరించనునందని తెలిసింది. 2013లో టోర్నమెంట్ లో స్పాట్ ఫిక్సింగ్, బెట్టింగ్ ఆరోపణలు వెల్లువెత్తిన సమయంలో రాజీవ్ శుక్లా ఐపీఎల్ చైర్మన్ గా కొనసాగారు. ఈ ఆరోపణల నేపథ్యంలో పదవికి రాజీనామా చేశారు.

జి. మనోహర్