చెన్నై ఐదోసారి టైటిల్ కి అడుగు దూరంలో

Posted: 05/22/2013 10:37 AM IST

ఐపీఎల్‌-6 టైటిల్ పోరులో రెండు అగ్రజట్ల మధ్య జరిగిన పోరులో భాగంగా స్థానిక ఫిరోజ్‌షా కోట్ల మైదానంలో జరిగిన తొలి క్వాలిఫయర్‌ మ్యాచ్‌లో ముంబై ఇండియన్స్ చెన్నై జట్టు చేతిలో చిత్తుగా ఓడింది. దీంతో చెన్నై టైటిల్ పోరులో ఫైనల్ కి దూసుకెళ్ళింది. చెన్నై సూపర్ కింగ్స్ జట్టు 48 పరుగుల తేడాతో ముంబైని ఓడించింది.  తొలుత టాస్‌నెగ్గి బ్యాటింగ్‌ ఎంచుకున్న చెన్నై జట్టు నిర్ణీత 20 ఓవర్లలో 192 పరుగల భారీ స్కోరు చేసింది. మైక్ హస్సీ (58 బంతుల్లో 86 నాటౌట్; 10 ఫోర్లు; 2 సిక్స్), సురేశ్ రైనా (42 బంతుల్లో 82 నాటౌట్; 5 ఫోర్లు; 5 సిక్స్) అజేయ ఆటతీరుతో అదరగొట్టడంతో ముంబై ముందు 193 పరుగల విజయ లక్ష్యాన్ని ఉంచారు. ముంబై బౌలర్లు ఏమాత్రం రాణించక పోవడంతో భారీగా పరుగులు సమర్పించుకున్నారు. అనంతరం బ్యాటింగ్ ప్రారంభించిన ముంబై ఇండియన్స్ 18.4 ఓవర్లలో 144 పరుగులకు కుప్పకూలింది. స్మిత్ (28 బంతుల్లో 68; 6 ఫోర్లు; 5 సిక్స్) ఒక్కడే రాణించాడు. మిగతావారు రాణించక పోవడంతో భారీ ఓటమిని మూటగట్టుకుంది. జడేజా, బ్రేవోలకు మూడు, మోహిత్‌కు రెండు వికెట్లు దక్కాయి. మ్యాన్ ఆఫ్ ద మ్యాచ్ పురస్కారం హస్సీకి దక్కింది. దీంతో చెన్నై ఐపీఎల్ లో ఐదోసారి ఫైనల్ చేరిన జట్టుగా రికార్డు సాధించింది.