Posted: 12/09/2012 04:41 PM IST

       పాకిస్తాన్ అంధుల క్రికెట్ జట్టు కెప్టెన్ జషన్ అబ్బాసి మంచినీళ్లు అనుకొని తక్కువ గాఢత కలిగిన ఫినాయిల్‌ను పొరపాటున తాగాడు. బెంగళూరులో అంధుల ప్రపంచకప్‌లో పాల్గొంటున్న పాక్ జట్టు విడిది చేసిన హోటల్‌లో ఈ సంఘటన జరిగింది. హోటల్ గదిలో అబ్బాసీ అల్పాహారం తీసుకునే సమయంలో టేబుల్‌పై ఉన్న ప్లాస్టిక్ బాటిల్‌ను మినరల్ వాటర్‌గా భావించడంతో ఈ పరిణామం చోటుచేసుకుంది. గదిని శుభ్రపరిచే సిబ్బంది తమ పని పూర్తి చేశాక ఫినాయిల్ బాటిల్‌ను అక్కడే మరచిపోవడం ఇందుకు కారణం.
        ఈ విషయం తెలియగానే టోర్నీ నిర్వాహకులు అతనిని ఎమ్‌ఎస్ రామయ్య మల్టీ స్పెషాలిటీ ఆస్పత్రికి తరలించారు. అతని ఆరోగ్యం నిలకడగా ఉండటంతో సాయంత్రం ఆస్పత్రి నుండి డిశ్చార్జ్ చేశారు. ఈ అంశంపై హోటల్ యాజమాన్యం లిఖిత పూర్వకంగా క్షమాపణలు తెలిపిందని అఖిల భారత అంధుల క్రికెట్ సంఘం అధ్యక్షుడు ఎస్‌పి నగేష్ తెలిపాడు. అయితే, బాధ్యులపై విచారణ నిర్వహించి నివేదిక ఇవ్వాలని ఆదేశించామని చెప్పాడు.
        కాగా, యాదృచ్చికంగా జరిగిన ఒక సంఘటన భారత్-పాక్ క్రికెట్ సంబంధాలకు అవరోధంగా మారకూడదని పాక్ జట్టు మేనేజర్ సుల్తాన్ షా అభిప్రాయం వ్యక్తం చేశాడు. టోర్నీని మెరుగ్గా నిర్వహిస్తున్నారని అతను అన్నాడు.

...avnk