Posted: 11/24/2012 12:48 PM IST

      

ప్రపంచ మేటి ఫాస్ట్ బౌలర్లను ఎదుర్కోవడం కంటే, ఆగ్రహంతో ఉన్న భార్యను సముదాయించడమే కష్టమని సచిన్ తెండూల్కర్ జోక్ చేశాడు. గత రాత్రి ముంబాయ్ లో ద్వారకానాథ్ సాంజిగిరి రాసిన మరాఠీ పుస్తకం ‘సంవాద్ లెజెండ్స్ షి’ ఆవిష్కరణ కార్యక్రమంలో పాల్గొన్న సచిన్ మాట్లాడుతూ తన వ్యక్తిగత జీవితం గురించి కొన్ని విషయాలు చేప్పాడు. నిప్పులు చెరిగే బంతులు వేసే ఫాస్ట్ బౌలర్‌ను ఎదుర్కోవడం కష్టమా లేక కోపంతో ఉన్న భార్యనా అని ఓ విలేఖరి ప్రశ్నించినప్పుడు సచిన్ సరదాగా స్పందించాడు. ‘ఇప్పటికే నన్ను ఇరకాటంలో నెట్టారు. ఇప్పుడు నేను ఇంటి వద్ద లేను కాబట్టి ధైర్యంగా ఓ మాట చెప్తాను. కోపంతో ఉన్న భార్యతో వేగడమే కష్టం’ అని చమత్కరించాడు.
       తనను మొదటి నుంచి ఎంతో ప్రోత్సహించిన తల్లి, తండ్రి, సోదరుడు, ఇతర కుటుంబ సభ్యుల గురించి సచిన్ పలు విషయాలను ప్రస్తావించాడు. వారి సహకారం లేకపోతే తాను క్రికెట్‌లో ఎదిగే వాడిని కానని స్పష్టం చేశాడు. భార్య అంజలి అన్నివిధాలా సహకరించడంతోనే తాను స్వేచ్ఛగా క్రికెట్ ఆడగలుకుతున్నానని చెప్పాడు. కుటుంబం, పిల్లల వ్యవహారాలన్నీ ఆమే చూసుకుంటున్నదని అన్నాడు.
          అంతకు ముందు జరిగిన కార్యక్రమంలో సచిన్ మాటలు ఇలాఉన్నాయ్.. క్రికెట్ క్లబ్ ఆఫ్ ఇండియా (సిసిఐ) సహకారంతోనే తాను క్రికెటర్‌గా ఎదిగానని సచిన్ అన్నాడు. బ్రబౌర్న్ స్టేడియం నిర్మించి 75 వసంతాలు పూర్తి చేసుకున్న సందర్భంగా సచిన్‌ను సిసిఐ ఘనంగా సన్మానించింది. సిసిఐలోనే తాను స్థానిక టోర్నమెంట్స్ ఆడానని, అప్పట్లో 18 సంవత్సరాల కంటే తక్కువ వయసుగల క్రికెటర్లకు డ్రెస్సింగ్ రూమ్‌లో ప్రవేశం ఉండేది కాదని సచిన్ తెలిపాడు. అయితే, మాధవ్ ఆప్టే, రాజ్ సింగ్ దుంగార్పూర్ 14 ఏళ్ల తనను డ్రెస్సింగ్ రూమ్‌లోకి అనుమతించేందుకు సిసిఐ నిబంధనలనే మార్చిన విషయాన్ని గుర్తుచేసుకున్నాడు. వారికి ఎప్పుడూ రుణపడి ఉంటానని చెప్పడు. సిసిఐతో జరిగిన ఒక మ్యాచ్‌లో తాను ఆప్టే, దుంగార్పూర్ వంటి మేటి ఆటగాళ్లను ఢీకొన్నట్టు చెప్పాడు. సిసిఐ తనను ఎంతో ప్రోత్సహించిందని, ఇప్పుడు తాను ఈస్థాయికి చేరుకోవడానికి పునాది వేసిందని తెలిపాడు. సిసిఐతో తనకు ఉన్న అనుబంధాన్ని నెమరు వేసుకున్నాడు.

...avnk