Posted: 06/04/2012 04:44 PM IST

కెప్టెన్సీపై నిరాసక్తతేమీ లేదని భారత క్రికెట్ జట్టు సారథి ఎంఎస్ ధోని స్పష్టం చేశాడు. భవిష్యత్ నాయకుడు ఎవరనేది సెలక్టర్లు చూసుకుంటారని చెప్పాడు. ‘ఫలానా వ్యక్తి నా వారసుడంటూ చెప్పడం నాకిష్టం లేదు. అసలది నాకు సంబంధంలేని విషయం. సెలక్టర్లు చూసుకుంటారు. నా దృష్టిలో మాత్రం కెప్టెన్‌గా నాకే ఓటు వేసుకుంటాను. పోటీగా తీసుకుంటే సెహ్వాగ్, గంభీర్, కోహ్లి ఉంటారు’ అని బారాముల్లాలోని సరిహద్దు నియంత్రణ రేఖ (ఎల్‌ఓసీ)ని సందర్శించిన ధోని తెలిపాడు. టెస్టు కెప్టెన్సీ ఇస్తే తీసుకుంటానని ఇటీవల గంభీర్ చెప్పిన విషయం తెలిసిందే. మరోవైపు ఉధంపూర్‌లోని నార్తర్న్ కమాండ్ హెడ్‌క్వార్టర్స్‌ను ధోని సందర్శించి అక్కడి అధికారులతో పాటు జవాన్లతో సంభాషించాడు. వారి పిల్లలతో ఉల్లాసంగా గడిపి ఆటోగ్రాఫ్‌లిచ్చాడు. గౌరవ లెఫ్టినెంట్ కల్నల్ హోదా పొందిన ధోని రెండు రోజుల పాటు సరిహద్దు సైన్యంతో గడిపాడు.