Posted: 05/14/2012 01:52 PM IST

2010లో భారత పర్యటనకు వచ్చిన సందర్భంగా కామెరూన్‌కు సచిన్ ఈ బ్యాట్‌ను బహుమతిగా ఇచ్చాడు. భారత బ్యాటింగ్ దిగ్గజం సచిన్ టెండూల్కర్ నుంచి ఎం తో ఇష్టంగా పొందిన ఓ బ్యాట్‌ను బ్రిటన్ ప్రధానమంత్రి డేవిడ్ కామెరూన్ వేలానికి పెట్టారు. రువాండాలో క్రికెట్ స్టేడియం నిర్మించేందుకు నిధుల సేకరణ కోసం నిర్వహించిన వేలంలో ఈ బ్యాట్ 3,400 పౌండ్ల (సుమారు రూ.3 లక్షలు)కు అమ్ముడుపోయింది. మాస్టర్ సంతకం చేసి ఇచ్చిన ఈ బ్యాట్‌ను అందుకున్నప్పుడు తానెంతో సంబరపడిపోయానని ఇటీవల ఓ కార్యక్రమంలో కామెరూన్ తెలిపారు. ఆ బ్యాట్‌తో తన భార్య సమంతా ఆడాలని చూసినా తాను ఇవ్వలేదని, అది తనకు అత్యంత విలువైనదని ఈ సందర్భంగా కామెరూన్ పేర్కొన్నారు.

కాళీమాతను దర్శించుకున్న సచిన్, హర్భజన్

ముంబై ఇండియన్స్ ఆటగాళ్లు సచిన్, హర్భజన్‌లు నగరంలోని ప్రసిద్ధమైన దక్షిణేశ్వర కాళీ ఆలయాన్ని దర్శించుకుని కాళీమాతకు పూజలు జరిపారు. ముంబై జట్టు బెంగళూరుకు బయలుదేరేందుకు ముందు ఉదయం 8.30 గంటల సమయంలో వీఐపీ ద్వారం గుండా ఆలయంలోకి వెళ్లిన వీరిద్దరు 15 నిమిషాలకు పైగా ఆలయంలో గడిపారు. సచిన్ వందో సెంచరీ చేసిన తరువాత నగరానికి రావడం ఇదే తొలిసారి. కాగా, కోల్‌కతాకు వచ్చిన ప్రతిసారీ కాళీ ఆలయాన్ని దర్శించుకునే సచిన్.. గత ఏడాది నవంబర్‌లో వెస్టిండీస్‌తో రెండో టెస్టు ఆడేందుకు వచ్చినా, కాళీమాతను దర్శించుకోకుండానే వెళ్లాల్సివచ్చింది.