కమల్ రాజకీయ ఆరంగ్రేటం త్వరలోనే...

Posted: 03/06/2017 12:26 PM IST

అమ్మ చావు తర్వాత తమిళ రాజకీయాల్లో రోజుకో కొత్త మలుపు.. సరికొత్త ట్విస్ట్ లే దర్శనమిస్తున్నాయి. కాంట్రవర్సీలతో వేడేక్కిస్తున్నాయి. ఆ మధ్య రజనీ ఆల్ మోస్ట్ రాజకీయాల్లోకి వచ్చేశాడంటూ చెప్పుకురాగా, ఇప్పుడు లోకనాయకుడు కమల్ పొలిటికల్ ఆరంగ్రేటంకి రంగం సిద్ధం చేసుకుంటున్నాడంటూ వార్తలు వస్తున్నాయి. పరిస్థితులు ఇంకా పూర్తిగా సర్దుమణగని తరుణంలో, ఆయన ఆలోచనలు రాజకీయాలపైకి మళ్లాయని విశ్లేషకులు చెబుతున్నారు.

తన అభిమాన సంఘాల నేతలతో ఆయన నిన్న సుదీర్ఘంగా సమావేశం అయిన ఈ విషయమై ఓ నిర్ణయం త్వరలోనే ప్రకటించబోతున్నాడని కూడా చెప్పుకుంటున్నారు. ముఖ్యంగా జయలలిత మరణం తర్వాత కమలహాసన్ వ్యవహారశైలిలో ఊహించని మార్పులు వచ్చాయి. ఎప్పుడూ రాజకీయాల జోలికి పోని ఈ విలక్షణ నటుడు జల్లికట్టు కోసం తన గొంతుకను కమల్ వినిపించారు. అంతేకాదు, పన్నీర్ సెల్వంను సీఎం పదవి
నుంచి దింపడం, శశికళ ముఖ్యమంత్రి కావడానికి చేసిన ప్రయత్నాల నేపథ్యంలో, కమల్ తనదైన శైలిలో తీవ్రంగా స్పందించారు.

తమిళ రాజకీయాలపై పూర్తిగా విసుగు చెందానని, ఈ దేశాన్నే విడిచి వెళ్లిపోతానని ఓ సందర్భంగా కమల్ వ్యాఖ్యానించి సంచలనం రేపారు. వాస్తవానికి తమిళనాడులో ఉండటానికే కమల్ ఇష్టపడరట. అలాంటి వ్యక్తి, ఇప్పుడు రాష్ట్ర పరిణామాలపై అనునిత్యం స్పందిస్తున్నారు. ఆయనలో వచ్చిన ఈ మార్పును చూసి, అందరూ ఆశ్చర్యపోతున్నారు. ఈ మార్పు వెనక ఓ బలమైన లక్ష్యం ఉందని భావిస్తున్నారు. పొలిటికల్ ఎంట్రీకి రంగం సిద్ధం చేసుకుంటున్నాడన్న సంకేతాలు అందుతున్న నేపథ్యంలో విశ్లేషకులు సలహాలు ఇస్తున్నారు.

కమల్ లాంటి క్రేజ్ ఉన్న హీరో రాజకీయాల్లోకి రావటానికి ఇదే సరైన సమయం అని వారు సూచిస్తున్నారు. చిరంజీవి, విజయ్ కాంత్ ల ఎదురు దెబ్బలు తగిలే అవకాశం కమల్ విషయంలో తక్కువగా ఉందని, పైగా తమిళనాడు రాజకీయాలు ఇలా అల్లకల్లోలంగా ఉన్న సమయంలోనే సమస్యలపై ఉన్నది ఉన్నట్లు అభిప్రాయం వ్యక్తం చేసే కమల్ కు ప్రజల సానుకూలత దక్కటం పెద్ద సమస్య కాదన్నది వారి అభిప్రాయం.

ఇక ఆదివారం ఏకంగా ఉదయం 10 గంటల నుంచి సాయంత్రం వరకు తన అభిమాన సంఘాల నేతలతో కమల్ సుదీర్ఘ మంతనాలు సాగించారు. దీనికి కమల్ ఫ్యాన్స్ సంక్షేమ సంఘం నేతలు, సంఘానికి చెందిన న్యాయవాదులు కూడా హాజరయ్యారు. సమావేశం అనంతరం, తమిళనాడులోని సమస్యలన్నింటినీ తొలగించాలంటూ ప్రభుత్వానికి కమల్ అల్టిమేటం కూడా ఇచ్చారు. ఈ నేపథ్యంలో, బీజేపీ, కాంగ్ నుంచి ఆహ్వానం అందుతున్నప్పటికీ కమల్ మాత్రం కొత్త పార్టీ ప్రకటించినా ఆశ్చర్యపోవాల్సిన అవసరం లేదనే వారు చెబుతున్నారు.