కేసీఆర్ చిరు సాయం ఎవరికోసం?

Posted: 06/10/2016 06:14 PM IST

తెలంగాణ ముఖ్యమంత్రి కేసీఆర్ కి తెలుగు చలన చిత్ర పరిశ్రమపై మంచి పట్టు ఉంది. సినిమాలు పెద్దగా చూడకపోయినప్పటికీ నటీనటులతో ఆయన మంచి సంబంధాలు కొనసాగిస్తారు. ముఖ్యంగా తెలుగు రాష్ట్రాలు విడిపోయాక చిత్ర పరిశ్రమ మొత్తం ఏపీకి తరలిపోతుందన్న పుకార్ల దశలో అలాంటి అవసరం ఏం లేదంటూ భరోసా ఇచ్చారు. విడిపోయింది భౌగోళికంగానే కానీ, మనుషులపరంగా కాదని, తెలుగు సినీ పరిశ్రమ ఇక్కడే నిరభ్యరంతంగా కొనసాగొచ్చని పేర్కొన్నారు.

ఒకానోక దశలో రాచకొండ ప్రాంతంలో భారీ ఫిల్మ్ సిటీ నిర్మించేందుకు ఆలోచన చేసినప్పటికీ రామోజీ రావు నుంచి వచ్చిన విజ్నప్తితో ఆయన వెనక్కి తగ్గాడన్న టాక్ ఉంది. మరోవైపు ఉన్న వనరులతో తెలుగు సినీ పరిశ్రమను అభివృద్ధి చెయొచ్చని సినీ పెద్దలంతా కోరటంతో ప్రస్తుతానికి ఆ నిర్ణయాన్ని పెండింగ్ లో పెట్టాడని భోగట్టా. అయితే త్వరలో హైదరాబాద్ చుట్టుపక్కల కొత్తగా ఓ స్టూడియో నిర్మాణానికి కేసీఆర్ పచ్చజెండా ఊపినట్లు తెలుస్తోంది.

తెలుగు ఇండస్ట్రీలో ఒకప్పుడు టాప్ అగ్రహీరోగా కొనసాగిన ఆయన అభిమానుల అండతో రాజకీయాల్లోకి వచ్చారు. అయితే అందరివాడిగా రాణించలేక ఢీలా పడిపోయిన ఆయన చాలా గ్యాప్ తర్వాత ముఖానికి రంగు వేసుకోబోతున్నారు. అయితే పనిలో పనిగా ఇరు రాష్ట్రాల్లో స్టూడియోల నిర్మించాలని ఆయన డిసైడ్ అయ్యారు. ఇప్పటికే వైజాగ్ లో స్థలాన్ని ఎంపిక చేసిన ఆయన దానికి సంబంధించిన పనులు కూడా మొదలుపెట్టినట్లు సమాచారం. ఇక తెలంగాణ లో నిర్మించబోయే స్టూడియో కోసం తెలంగాణ ప్రభుత్వ మద్ధతు కోసం ఇంత కాలం ఎదురు చూశారు.

ఇటీవల కేసీఆర్ తో కలిసి ఓ చిత్ర ఓపెనింగ్ కార్యక్రమంలో పాల్గొన్న ఆ స్టార్ హైదరాబాద్ లో స్టూడియో నిర్మాణ ప్రతిపాదనను ఆయన ముందు ఉంచారంట. రాజకీయాలపరంగా కూడా ఆ స్టార్ హీరోతో ఎలాంటి వైరమ్యం లేకపోవటంతో దీనికి సుముఖత వ్యక్తం చేసిన కేసీఆర్ అందుకు అవసరమైన సాయం అందిస్తానని హామీ కూడా ఇచ్చారంట. అడ్డంకులు లేకపోవటంతో త్వరలో స్టూడియో నిర్మాణం ప్రారంభమయ్యే అవకాశం ఉందని తెలుస్తోంది. స్థల ఎంపిక తోపాటు, అవసరమైన అనుమతులు కూడా టీ సర్కార్ నుంచి లభించే అవకాశాలు ఉన్నాయి. ఆ స్టూడియో కోసం ఎన్నో పేర్లు పరిశీలించి చివరకు తన ఇంటి పేరును ఫైనలైజ్ చేశారని తెలుస్తోంది. ఇంతకీ ఆ స్టార్ ఎవరో ప్రత్యేకంగా చెప్పాల్సిన అవసరం లేదేమో!

భాస్కర్