బిజినెస్ అదిరింది గురూ..!

Posted: 06/06/2016 05:31 PM IST

Jr ntr janatha garrage movie bussiness going huge

టాలీవుడ్ లో యంగ్ టైగర్ ఎన్టీఆర్ తన రేంజ్ ని పెంచుకుంటూ పోతున్నాడు. ప్రస్తుతం హీరోగా నటిస్తున్న 'జనతా గ్యారెజ్' సినిమాపై అభిమానుల్లో ఇప్పట్నుంచే ఏ స్థాయిలో అంచనాలున్నాయో ప్రత్యేకించి చెప్పాల్సిన పనిలేదు. ఈమధ్యనే విడుదలైన ఫస్ట్‌లుక్‌తో అభిమానులంతా సినిమాపై అంచనాలను మరింత పెంచేసుకుంటూ వెళుతున్నారు. ఇక ఈ నేపథ్యంలోనే సినిమాకు ప్రీ రిలీజ్ బిజినెస్ కూడా పెద్ద ఎత్తున జరుగుతోంది. కొరటాల శివ తెరకెక్కించిన సినిమా కావడంతో జనతా గ్యారెజ్ ప్రీ రిలీజ్ బిజినెస్ అందరినీ ఆశ్చర్యపరుస్తోంది. అటు మాలీవుడ్ లో అయితే మోహన్ లాల్ సినిమాలో ఉన్నాడనో లేదా తారక్ సంచలన మార్కెట్టో తెలీదు కానీ సినిమాకి భారీ స్థాయిలో రేటు పలుకుతోందట. ఇక తమిళంలో కూడ ఈ సినిమాకి మార్కెట్ తక్కువగా ఏమీలేదు. విపరీతంగా సినిమాకోసం భారీ ఆఫర్లు వస్తున్నట్లుగా తెలుస్తోంది.

ముఖ్యంగా తెలుగు సినిమాకు మంచి మార్కెట్ ఉన్న కర్ణాటక ప్రాంతంలో ఈ సినిమాను పంపిణీ చేసేందుకు పలు పెద్ద డిస్ట్రిబ్యూషన్ సంస్థలు పోటీలో ఉన్నట్లు తెలుస్తోంది. దాదాపు 7 కోట్లకు ఈ ప్రాంత పంపిణీ హక్కులు అమ్ముడైనట్లు సమాచారం. ఇటీవలే ఈ సినిమా చెన్నైలో ఓ భారీ షెడ్యూల్ పూర్తి చేసుకుని త్వరలోనే హైద్రాబాద్‌లో ఓ షెడ్యూల్ మొదలుపెట్టనుంది. ఈ సినిమాలో ఇప్పటికే భారీ తారగణాన్ని అన్ని భాషల్లోనుంచి దింపిన డైరెక్టర్ కొరటాల శివ ఇప్పుడు ఎన్టీఆర్ రేంజ్ ని ఈ సినిమాతో ఒక్కసారిగా పెంచేందుకు ప్రయత్నాలు చేస్తున్నాడు. నాన్నకు ప్రేమతో సినిమా ద్వారా ఓవర్సీస్ బిజినెస్ కూడ ఎన్టీఆర్ సొంతం చేసుకున్న సంగతి తెలిసిందే. కొసమెరుపు ఏంటంటే జూనియర్ ఎన్టీఆర్ సినిమాలకు జపాన్ లో విపరీతమైన క్రేజ్ ఉండటంతో ఇప్పుడు ఈ సినిమాకి ఆ మార్కెట్ కూడ తోడయ్యింది. ఇక ఈ ట్రేడ్ గణాంకాలను చూసి సినీ విశ్లేషకులు సైతం ఆశ్చర్యపోతున్నారు.