క్రేజీ టైటిల్ తో మహేష్ రానున్నాడా?

Posted: 12/30/2015 06:26 PM IST

ప్రిన్స్ మహేష్ బాబు హీరోగా ‘గజిని’, ‘తుపాకీ’, ‘కత్తి’ వంటి భారీ బ్లాక్ బస్టర్ హిట్ చిత్రాలను తెరకెక్కించిన దర్శకుడు ఏఆర్ మురుగదాస్ దర్శకత్వంలో ఓ చిత్రం తెరకెక్కనున్న విషయం తెలిసిందే. ఈ ప్రాజెక్టును ప్రముఖ నిర్మాతలు ఆర్.బి.చౌదరి, ఎన్వీ ప్రసాద్ లు సంయుక్తంగా నిర్మించనున్నారు. ఈ సినిమాకు ప్రముఖ సినిమాటోగ్రాఫర్ సంతోష్ శివన్ సినిమాటోగ్రఫిని అందించనున్నారు.

ప్రస్తుతం సమాజంలో జరుగుతున్న అన్యాయాలు, న్యాయవ్యవస్థ, రాజకీయాల వంటి అంశాలపై రూపొందనున్న ఈ కమర్షియల్ యాక్షన్ ఎంటర్ టైనర్ పై భారీ అంచనాలే నెలకొన్నాయి. ఇప్పటికే ఈ సినిమా కోసం పలు రకాల టైటిల్స్ వినిపించాయి. తాజాగా ‘ఎనిమి’ అనే టైటిల్ ను పరిశీలిస్తున్నట్లుగా తెలిస్తోంది.

తెలుగు, తమిళం భాషలలో ఏకకాలంలో దాదాపు 120 కోట్ల భారీ బడ్జెట్ తో రూపొందనున్న ఈ సినిమా కోసం మహేష్ దాదాపు 30 కోట్ల రెమ్యునరేషన్ తీసుకోనున్నాడని సమాచారం. త్వరలోనే ఈ ప్రాజెక్టుకు సంబంధించిన అన్ని వివరాలను అధికారికంగా ప్రకటించనున్నారు.

ప్రస్తుతం మహేష్ ‘బ్రహ్మోత్సవం’ సినిమా షూటింగ్ లో బిజీగా వున్నాడు. శ్రీకాంత్ అడ్డాల దర్శకత్వంలో రూపొందుతున్న ఈ చిత్రాన్ని భారీ బడ్జెట్ చిత్రాల నిర్మాణ సంస్థ పివిపి బ్యానర్ పై ప్రసాద్.వి.పోట్లూరి నిర్మిస్తున్నారు. ప్రస్తుతం ఈ చిత్ర షూటింగ్ శరవేగంగా జరుగుతోంది. వచ్చే ఏడాది వేసవి సెలవుల కానుకగా ఈ సినిమాను విడుదల చేయడానికి సన్నాహాలు చేస్తున్నారు.