కాజల్ తో మరోసారి రొమాన్స్ చేయనున్న మెగాహీరో

Posted: 09/29/2015 03:15 PM IST

Kajal agarwal to romance with ram charan again in thani oruvan remake

తెలుగు ఇండస్ట్రీలో స్టార్ స్టేటస్ పొందిన కథానాయికల్లో కాజల్ అగర్వాల్ ఒకరు. ‘మగధీర’ సినిమాతో ఒక్కసారిగా లైమ్ లైట్ లోకి వచ్చిన ఈ అమ్మడి డిమాండ్ భారీగా పెరిగిపోయింది. దీంతో ఈమెతో నటించేందుకు సీనియర్లతోపాటు జూనియర్ హీరోలు ఆసక్తి చూపారు. ప్రస్తుత రోజుల్లో ఈమె డిమాండ్ కాస్త తగ్గినప్పటికీ.. భారీ ఆఫర్లు బాగానే అందిపుచ్చుకుంటోంది. మూడుపదుల వయస్సు దాటినప్పటికీ ఇంకా చెదరని అందంతో అందరినీ మైమరిపిస్తున్న ఈ బొద్దుగుమ్మ మాయాజాలం ఇప్పటికీ ఇండస్ట్రీలో కొనసాగుతూనే వుంది. అందుకే.. ఈమెతో చాలా సినిమాల్లో నటించి విజయాలు దక్కించుకున్న ఓ మెగాహీరో.. మరోసారి ఆమెతో రొమాన్స్ చేసేందుకు రెడీ అవుతున్నాడు. ఆ మెగాహీరో ఎవరని అనుకుంటున్నారా! మరెవ్వరో కాదు.. రామ్ చరణ్. ఈ మెగాహీరో నటించబోయే తదుపరి చిత్రంలో హీరోయిన్ గా ఈ అమ్మడినే ఎన్నుకున్నట్లు ఇండస్ట్రీలో వార్తలు వినిపిస్తున్నాయి.

తమిళంలో తెరకెక్కిన ‘తని ఒరువన్’ చిత్రం భారీ విజయం సాధించడంతో దాన్ని తెలుగులో రీమేక్ చేసేందుకు సన్నాహాలు చేస్తున్నారు. రామ్ చరణ్ హీరోగా నటించనున్న ఈ రీమేక్ చిత్రంలో హీరోయిన్ గా కొందరు తారలను పరిశీలించారు. అయితే.. చివరగా కాజల్ అగర్వాల్ ని ఎంపిక చేసినట్లు ఇండస్ట్రీలో చెప్పుకుంటున్నారు. ప్రస్తుతం చెర్రీ నటిస్తున్న ‘బ్రూస్ లీ’ సినిమా షూటింగ్ ముగింపు దశకు చేరుకుంది. మిగతా షూటింగ్ అయిన వెంటనే ‘తని ఒరువన్’ రీమేక్ చిత్రాన్ని తెరకెక్కంచేందుకు ప్లాన్ చేస్తున్నారు. ‘బ్రూస్ లీ’ చిత్రాన్ని నిర్మిస్తున్న డీవీవీ దానయ్యే ‘తని ఒరువన్’ రీమేక్ రైట్స్ దక్కించుకున్నాడు. అందుకే.. ఆయన అప్పుడు చరణ్ కథానాయకుడిగా కొత్త సినిమాకి సంబంధించిన సన్నాహాలు మొదలు పెట్టేశాడు. ఇప్పటికే ఈ రీమేక్ సినిమా పోస్ట్ ప్రొడక్షన్ కార్యక్రమాలను ప్రారంభించినట్లు తెలుస్తోంది. ఇందులో భాగంగానే ఈ చిత్రంలో కథానాయికగా కాజల్ అగర్వాల్ ని సంప్రదిస్తున్నట్టు తెలిసింది. మరి.. ఈ ఆఫర్ కి ఆమె గ్రీన్ సిగ్నల్ ఇస్తుందో లేదో వేచి చూడాల్సిందే!

ఇదిలావుండగా.. గతంలో చరణ్, కాజల్ జోడీగా నటించిన ‘మగధీర’, ‘నాయక్’, ‘గోవిందుడు అందరివాడేలే’ చిత్రాలు అభిమానుల్ని ఎంతగానో అలరించాయి. ముఖ్యంగా ‘మగధీర’ చిత్రం ఆమె కెరీర్ ని మలుపు తిప్పింది. అందుకే.. చెర్రీతో నటించే అవకాశాలు వచ్చిన వెంటనే ఓకే చెప్పేసింది. ఈసారి కూడా ‘తని ఒరువన్’ రీమేక్ చిత్రంలో నటించేందుకు గ్రీన్ సిగ్నల్ ఇస్తుందని వార్తలు బలంగా వినిపిస్తుంది. లెటజ్ వెయిట్ అండ్ సీ!

AS